Санкт-Петербуурдааҕы "Клинок на Неве" норуоттар икки ардыларынааҕы атыы-быыстапка быйыл 6-с төгүлүн олунньу 17-20 күннэригэр ыытылынна.
Манна Саха сириттэн Ньурба улууһун тимир уустарын «Сата Уус» ассоциацията кытынна. Онно бааллар: Ариан Афанасьев — Арыйаан Уус, Иван Саввинов, Иван Тимофеев уонна Александр Васильев — Байдам Уус. Кинилэри кытта Саха сирин аатыттан Уус Алдан улууһун тимиргэ ууһа Альберт Олесов кытынна. Үөрүүлээх сонуну Саха сирин Арассыыйаҕа бэрэстэбиитэлистибэтэ иһитиннэрдэ.
«Бачча улахан быыстапкаҕа кэлэн кыттарбытыгар биһиэхэ Ньурба улууһун дьаһалтата уонна биисинэс инкубатора көмөлөстө. Тус бэйэм быыстапкаҕа 50 быһаҕы аҕаллым. Олортон 10-тан тахса быһах былыргы ньыманан сата таастан (рудаттан) уһаарыллыбыта. Көрөөччүлэр оҥоһуктарбытын наһаа сэргээтилэр, хас да быһаҕы атыыластылар”, - диэн Ассоциация салайааччыта Ариан Афанасьев - Арыйаан Уус кэпсиир.
Ньурба тимир уустара быыстапкаҕа быһахтары таһынан хомустары, уус-уран оҥоһуктары, батастары уонна обургу быһахтары – хотохоннору илдьэн туруорбуттар.
Быһахтары, буоларын курдук, тургутан көрдүлэр. Кыайыылаахтары РФ култууратын министиэристибэтин, Саа-саадах эспиэртэрин национальнай ассоциациятын, Ускуустуба үлэһиттэрин ассоциациятын, «Эрмитаж» судаарыстыбаннай түмэл идэтийбит эспиэртэрэ кыттыылаах дьүүллүүр сүбэ быһаарда.
Быыстапка үлэтин түмүгүнэн Ньурба уустара, оҥоһуктара үрдүк көрдөрүүлээх буолан, бастыҥнар ахсааннарыгар киирдилэр. Онон кинилэр, Арассыыйа бастыҥ уустарын бастакытын кыайаннар, элбэх бириистээх миэстэни ыланнар, үөрүүлэрэ үрдүк.
Уус аймах добун түһүлгэтигэр саха быһаҕын суон сурахтаан кэлбит сахабыт уустарын дохсун ытыс тыаһынан көрсүөҕүҥ, уруй-айхал тылларынан эҕэрдэлиэҕиҥ!
Быыстапка түмүгэ:
«Арассыыйа бастыҥ быһаҕа» ааты ылар иһин биилээх оҥоһуктары тургутан көрүү:
«Эт быһаҕа» (разделочный нож) номинацияҕа (биитин уһуна – 120 мм диэри) 2-с миэстэ - «Охотник» быһах ааптара Иван Саввинов; «Эт быһаҕа» номинацияҕа (биитин уһуна - 120-150 мм) 1-кы миэстэ - «Булчут» быһах ааптара Александр Васильев; «Эт быһаҕа» номинацияҕа (биитин уһуна 120-150 мм) 3-с миэстэ - «Тайҕа» быһах ааптара Александр Васильев; «Национальнай быһах» номинацияҕа 1 миэстэ - «Булчут» быһах ааптара Иван Тимофеев, 2-с миэстэ - «Охотник» быһах ааптара Иван Саввинов, 3-с миэстэ -«Удьуор» саха быһаҕын ааптара Иван Тимофеев.
«Куукуна быһаҕа»:
«Орто кээмэйдээх быһах» номинацияҕа 1-кы миэстэ - «Саха» быһах ааптара Иван Саввинов; «Национальнай быһах» номинацияҕа 1-кы миэстэ - Александр Васильев - Байдам Уус, 2-с миэстэ - Иван Тимофеев, 3-с миэстэ Иван Саввинов,.
«Уус-уран оҥоһуктар»:
«Орто кээмэйдээх бии» номинацияҕа 3-с миэстэ - «Батыйа» ааптара Ариан Афанасьев - Арыйаан Уус;
«Композиция» номинацияҕа 2-с миэстэ - «Эра мамонтов» оҥоһук ааптара Александр Васильев -Байдам Уус, 3-с миэстэ «Сата Уус» оҥоһук ааптара Ариан Афанасьев - Арыйаан Уус.
