Киир

Киир

Быйыл Мииринэй оройуонугар отутус төгүлүн ыытыллар сахалыы ырыаны толорор эдэр ырыаһыттартан бастыҥы талыы үбүлүөйдээх “Туой Хайа” бэстибээлэ буоларын иһитиннэрэн турабыт. Бэстибээл тэрээһиннэригэр эстрада ырыатын толорор биирдиилээн да, кэлэктиибинэн да кыттыахха сөп. Күн бүгүҥҥү туругунан Саха сирин 20 улууһуттан 50-тан тахса эстрада ырыаһыта кыттар баҕалааҕын биллэрдэ.

«Биһиги быйыл “Туой Хайа” куонкурус үбүлүөйдээх отутус сезонун ыытаары олоробут. Тустаах бырайыак сыала-соруга – саҥа тахсан эрэр ырыаһыт ымыылары, талааннаах ыччаты өйөөһүн. Бу – АЛРОСА Култуурунай-спортивнай холбоһугун биир муҥутуур киэҥник тарҕаммыт уонна биһирэнэр, айар талааннары өйүүр бырайыага буолар. Өрөспүүбүлүкэ оройуоннарын олоччу хабар. Бу куонкуруска кыттыы бэйэ талаанын арыйар, ырыаһыттар уонна кинилэр салайааччыларын идэтийиигэ таһымнарын үрдэтэр, репертуардарын саҥа ырыаларынан толороллоругар үтүө тоҕооһу биэрэр, биир санаалаахтарын кытта ыкса алтыһалларыгар көмөлөһөр”, – диэн АЛРОСА КСК дириэктэрэ Мотрена Скрябина анаан бэлиэтиир.

WhatsApp Image 2022 03 10 at 14.50.36

Куонкуруска кыттар сайаапкалары тутуу бу дьыл тохсунньу 20 күнүттэн саҕаламмыта. Быйыл бэстибээл уратыта – аан бастаан икки куонкурустаах буолла. Ол эбэтэр, 18-тан 35 саастарыгар диэри эдэр дьоҥҥо уонна 8-тарыттан 17 саастарыгар диэри оҕолорго тус-туһунан күрэс ыытыллар.

Бастыҥнары талыы түһүмэхтэрэ онлайн-көрүҥүнэн ыытыллыахтара. АЛРОСА КСК дириэктэрин солбуйааччы Лев Колесов: «Кэнсиэри ыытыы олоҕурбут үгэһиттэн хоруона хамсыгын хааччаҕыттан сиэттэрэн эрэ аккаастамматыбыт. Биһиги төһө кыалларынан элбэх кыттааччыны хабар, түмэр интэриэстээхпит. Былырыыҥҥы уопут бэстибээли маннык көрүҥүнэн ыытыы быдан элбэх кыттааччыны түмэрин уонна салгыы сайдар кыаҕа улаханын көрдөрдө. Бу куонкурус – “онлайн” форматынан ыытыллара ордук барсар аҕыйах ахсаанннаах тэрээһинтэн биирдэстэрэ. Хааччах кэмэ биһиги бэстибээлбитин үтүө өттүгэр уларытта. Ол курдук, ыраахтан олорон уонна бэйэ кэлэн кыттыытын холбуу тутан тэрийии кыттааччы ахсаанын да, бэстибээл хабар иэнин да лаппа кэҥэттэ», – диир.

Улахан дьон ортотугар бастакы талыы түһүмэҕэ бэлиэр саҕаланна, куонкуруска кыттааччылар иккилии ырыаларын биидьийэҕэ устан ыыталлар. Оттон оҕолор сайаапкаларын хомуйуу муус устар 11 күнүттэн саҕаланыа. Улахан дьонтон уратыта, оҕо ырыаһыттартан биирдии биидьийэ сөп буолар.

WhatsApp Image 2022 03 10 at 14.50.37

Туйаара Попова, «Туой Хайа» култуура дьиэтин дириэктэрэ:

– Артыыстар толорууларын продюсер, блогер уонна саха эстрадатын биллиилээх артыыһа, биһиги бэстибээлбитин кытта үлэлэспитэ ырааппыт Антон Иванов бэрэссэдээтэллээх дьоһун дьүүллүүр сүбэ көрүө-сыаналыа. Ырыаһыттар илэ, бэйэлэрэ кэлэн кыттыылара, көрөөччүлэри кытта көрсүһүүлэрэ ыам ыйын бүтэһигэр былааннанар. Оҕолор да, улахан да ырыаһыттар Арыылаах бөһүөлэгин “Туой Хайа” култуура дьиэтигэр буолар бэстибээл сабыллыытыгар кыттыахтара. Оттон гала-кэнсиэр Мииринэй куоракка, “Алмаз” култуура дьиэтигэр буолуоҕа. Кэнсиэр быһа эпииринэн «Алмазный край» медиахампаанньа YouTube-ханаалыгар көстүөҕэ.

Тэрээһин чэрчитинэн, бэстибээл кыттыылаахтарын кэнсиэрэ, араас маастар-кылаастар, айар талааннаахтар көрсүһүүлэрэ тэриллиэхтэрэ. Ону таһынан бэстибээл буолар кэмигэр “Аһаҕас микрофон” үлэлиэҕэ. Кыттааччылар куонкуруһу таһынан бэйэлэрэ сөбүлүүр ырыаларын толоруохтарын сөп.

Куонкурус устуоруйата “Туой Хайа” бэстибээл саҥа талааннары арыйарга табыгастаах аартык, айымньылаах үлэҕэ тахсар бигэ тирэх буоларын көрдөрбµтэ быданнаата. Былырыын бэстибээлгэ өрөспүүбүлүкэ 32 улууүуттан 154 эстрада толорооччута кыттыбыта.

«Куонкурус ыытыллан кэлбит отут сылын тухары үтүмэн үгүс саҥа ааттары таһаарда, киэҥ эйгэҕэ биллэрдэ. Куонкуруска кыттыбыт үгүс ырыаһыт аан бастакы ситиһиитин бу бэстибээлгэ билэн, салгыы киэҥник биллэр-көстөр ырыа´ыт буола сайдыбыта», – диэн “Туой Хайа” култуура дьиэтин уус-уран салайааччыта Любовь Лонкунова этэрэ оруннаах.

Бу отут сыл была´ын тухары “АЛРОСА” хампаанньа бэстибээлгэ успуонсардаан кэллэ. Быйылгы куонкуруска алмаас хампаанньата бириис пуондугар анаан 400 тыһ. тахса солкуобайы көрдө. Итинтэн кыайыы кынаттаммыт ылбаҕай ырыаһыт 200 тыһ. солк. ылыаҕа. Лауреаттар уонна дипломаннар эмиэ харчынан бириэмийэлэниэхтэрэ. Үбүлүөйдээх тэрээһин буоларынан, Култуура-успуорт холбоһуга анал бирииһи – 20 тыһ. солк. – туруоруоһа. Ону таһынан, биир кыттааччы “Көрөөччµ биһирэбилин бирииһэ” номинацияҕа тиксиэҕэ.

WhatsApp Image 2022 03 10 at 14.50.36 2

“Туой Хайа” сахалыы эстрада ырыатын бэстибээлигэр кыттыы туһунан сиһилии иһитиннэриини, куонкурус официальнай саайтыгар http://tuoihaya-ksk.ru/ киирэн билсэргитигэр сүбэлиибит. Ону сэргэ +7 914 285 5072 (Татаринова Майя) нүөмэргэ эрийэн, ыйыталаһар, быһаартарар кыахтааххыт. Куонкуруһу сүрүннээччи, “Туой Хайа” КДб уус-уран салайааччыта Лонкунова Любовь төлөпүөнүн нүөмэрэ: +7 914 257 2513.

Кыттыҥ, кыайыҥ, сахалыы алыптаах ырыа тарҕанарыгар, талааннаах ыччат үксүүрүгэр күүс-өйөбүл буолуҥ!

Тарҕат:

Санааҕын суруй