Саха АССР төрүттэммитэ 100 сылын уонна Арассыыйа Федерациятыгар култуура нэһилиэстибэтин Сылын чэрчитинэн, Өксөкүлээх Өлөксөй аатынан норуоттар доҕордоһууларын дьиэтэ «Өбүгэ нэһилиэстибэтэ» («Наследие предков») быыстапкатын үөрүүлээх арыллыыта буолан ааста.
Быыстапка икки чаастан турар, сахалар уонна славяннар 18-19 үйэтээҕи култуураларын көрдөрөр.
Саха култууратын көрдөрөр эспэнээттэр тустарынан «Саха сирин норуодунай түмэлэ» кэмиэрчэскэйэ суох уопсастыбаннай тэрилтэ салайааччыта Майя Аркадьевна Мордовская кэпсээтэ. Оттон былыргы көстүүмнэри, рушниктары кэллэксийэниэр, норуодунай куукула маастара Светлана Витальевна Пономарева билсиһиннэрдэ.
Өксөкүлээх Өлөксөй аатынан Норуоттар доҕордоһууларын дьиэтин генеральнай дириэктэрэ Антонида Корякина быыстапка умнуллуо суохтаах ааспыт кэм тыынын көрдөрөр диэн эттэ. Маныаха, ол туһугар саҥа көлүөнэҕэ тиэрдэн иһии тоҕоостооҕун бэлиэтээтэ уонна кэллэксийэниэрдэргэ энтузиазмнарын, быыстапканы тэрийиигэ тирэх буолбуттарын иһин махталын биллэрдэ.
Быыстапканы үөрүүлээх арыйыы бириэмэтигэр «Саха Өрөспүүбүлүкэтин кэллэксийэниэрдэрэ» Эрэгийиэннээҕи уопсастыбаннай тэрилтэ бэрэссэдээтэлэ Никифор Иванов тыл эттэ, Дьокуускай куорат 30№-х орто оскуолатын үөрэнээччилэрэ хоһоонунан дьүһүйүүнү көрдөрдүлэр. Саскыйа Бугаева хомуска оонньоото, Ирина Стрекаловская салайааччылаах «Ямские бубенцы» дьаамсыктар сыдьааннарын уонна «Русь» нуучча норуодунай ырыатын ансаамбыллара ырыалары толордулар.
Быыстапкаҕа кэлбит дьон саха тимир уустарын 19-с үйэ бүтүүтүн, 20-с үйэ саҕаланыытын саҕанааҕы оҥоһуктарын, боруонса салбырҕастаах кымыһы кутар көҥкөлөйү, славяннар таҥастан куукулаларын уонна даҕаны атын ураты эспэнээттэри көрүөхтэрэ.
«Өбүгэ нэһилиэстибэтэ» («Наследие предков») быыстапка Өксөкүлээх Өлөксөй аатынан норуоттар доҕордоһууларын дьиэтин хаҥас фойетыгар үлэлии турар, киирии босхо.
Өксөкүлээх Өлөксөй аатынан норуоттар доҕордоһууларын дьиэтин пресс-сулууспатыттан
