Кулун тутар 28 күнүгэр П.А.Ойуунускай аатынан Саха академическай театрын лабораторнай саалатыгар эдэр суруйааччылар сүбэ мунньахтарын чэрчитинэн драма сценарийын суруйууга маастар-кылаас ыытылынна.
Маастар-кылаас санаа атастаһыытын быһыытынан олус истиҥник уонна сэргэхтик барда. Саха театрын сүрүн режиссера, СӨ ускуустубатын үтүөлээх диэйэтэлэ Руслан Тараховскай уонна Саха театрын литература чааһын сэбиэдиссэйэ Ангелла Попова саҥа саҕалыыр драматурдарга сценарийы суруйууга туох алҕастар тахсалларын, аныгы кэм геройун уобараһа хайдах буолуохтааҕын, режиссеру кытары драматург хайдах үлэлиэхтээҕин туһунан кэпсээтилэр.
Руслан Игоревич эдэр суруйааччылары театрга сыһыаран, кинилэр режиссердары, художниктары кытта бодоруһан, хардарыта дьайсан үлэлээтэхтэринэ эрэ дьоһуннаах, сиппит-хоппут айымньы тахсарын тоһоҕолоон бэлиэтээтэ. «Иван Гоголев Федот Потаповтыын, Николай Лугинов, Баһылай Харысхал Андрей Борисовтыын ыкса алтыһан, чугастык тутуһан айбыттарыттан-туппуттарыттан саха норуота бүттүүнэ киэн туттар айымньылара тахсыбыттара. Ол ситим салҕаныахтаах», – диэтэ режиссер.
Тэрээһиҥҥэ сүрүн санаа быһыытынан суруйааччы театры кытта эйгэлэһэн, биир санаанан салайтаран үлэлээтэҕинэ драматург быһыытынан ситэн-хотон тахсара этилиннэ. Маныаха драматургия ирдэбиллэрин уонна сокуоннарын тутуһар, ускуустуба эйгэтигэр уһуйуллар наадата болҕомтоҕо ылылынна. Холобура, Чехов МХАТ-ка, Островскай Малай театрга эбэтэр Шекспир Глобус диэн Лондоннааҕы театрга уһуйуллубуттара ахтылынна.
«Эдэр суруйааччылар сүбэ мунньахтара туһалаах уонна интэриэһинэй тэрээһинтэн саҕаланна», – диэн тэрийээччилэр бэлиэтииллэр. Чопчулаан эттэххэ, бүгүн уонна сарсын сүбэ мунньах эмиэ Саха театрын саалатыгар ыытыллар. Ол эмиэ мээнэҕэ буолбатах. «Олохпутун араас ньыманан дьүһүйэн суруйар дьоммут театр алыптаах эйгэтигэр умсан, тыл-өс уонна өй-санаа туругар киирэн, айымньылаах үлэлэрэ өссө тэтимириэ, ис хоһооно өссө дириҥиэ», – диэн баҕа санаа этилиннэ
П.А.Ойуунускай аатынан
