Муус устар 2 күнүгэр, «Арассыыйа – мин устуоруйам» Устуоруйа пааркатыгар «Я (не) боюсь» саха худуоһунньуктарын быыстапкатын үөрүүлээх аһыллыыта буолан ааста. «Кындыкан» айар-тутар түмсүү мустубут ыалдьыттарга хоту дойду тиэмэтигэр «туһалаах» хартыыналары ойуулуурга маастар-кылаас ыытта.
««Я (не) боюсь» быыстапка – ускуустуба дьонун уонна көрөөччүлэри биир кэпсэтиигэ ыҥырар ураты көстүү. Худуоһунньуктар көрөөччүлэри кытта ускуустуба тылынан кэпсэтэллэр, оттон көрөөччүлэр бэйэлэрин куттанар кутталларын уонна аныгы кыһалҕалары утары көрөр кыахтаналлар. Айар үлэ саҥарар тыллааҕар хаһан баҕар улаханнык этинэр. Глобальнай ириэрии уонна хотугу дойду климатын уларыйыытын тиэмэтэ Кирилл Павлов «Protect eternity of permafrost» уонна Арьяна Шарипова «Не уберечь» үлэлэригэр көстөр. Ааптардар климат уларыйыытын уонна экологияны харыстааһын туһунан дириҥ тиэмэлэри таарыйалларыттан куттамматтар. Саха сирин олохтоохторо бу быыстапканы кэлэр көрөн, глобальнай уларыйыылар кыһалҕаларын туһунан толкуйдууллара ордук», - диэн Кындыкан бырайыак ааптара Маргарита Попова кэпсиир.
Быыстапка үөрүүлээх аһыллыытыгар ускуустуба диэйэтэллэрэ худуоһунньуктары эҕэрдэлээтилэр уонна тэрээһин сүрүн суолтатын туһунан эттилэр, маны таһынан, ураты көстүү - классическэй хартыынаны кытта технология мультимедиятын сиинтэһэ баарын туһунан сырдаттылар.
Маргарита Попова үөрүүлээх аһыллыы бириэмэтигэр тыл эттэ, айар-тутар идэлээхтэри эҕэрдэлээтэ уонна «100 хартыына» бырайыак кураторыгар Айна Куртцка махталын биллэрдэ.
«Биһиги бары кутталы кытта көрсөбүт. Куттал оргууй улаатар, оччоҕуна биһиги онтон босхолоно сатыыбыт эрээри, хайдах дьаһанарбытын билбэппит. Кутталтан саһыы - кыһалҕаны туоратыы буолбатах. Биһиги бары күүспүтүн түмэн, хайдах баарынан ылыннахпытына, босхолонор кыахтаныахпыт. Онон, быыстапка сценарийа үс тиэмэни таарыйар – боруҥуй буолуута, түүн уонна халлаан сырдыыта. Боруҥуй буолуутугар үүнэн эрэ дьалхаан, оттон түүҥҥүгэ кутталы кытта алтыһыы тиэмэлэрэ арыллаллар. Дьэ, ону кыайан, көрөөччү үөрүүлээх бүгүҥҥүгэ тиийэр – күн тахсыытын, халлаан сырдыыр түгэнин, ол аата сарсыҥҥыга эрэли көрөр», - диэн Саха Өрөспүүбүлүкэтин Худуоһунньуктарын Сойууһун бэрэссэдээтэлэ Ольга Скорикова кэпсиир.
Айар-тутар түмсүү «Рассвет» саалаҕа быыстапканы көрөөччүлэргэ маастар-кылаас ыытта. Биир күн иһигэр 5 хартыына ойууланна, бу балар Саха АССР төрүттэммитэ 100 сылыгар анаммыт 100 кэллиэксийэ иһигэр киириэхтэрэ.
“100 хартыына аахсыйа” Уһук Илиннээҕи дьахтар форумун кэмигэр, кулун тутарга саҕаламмыта.
Салгыны ыраастыыр кыраасканан ойууламмыт хартыыналар Саха сиригэр мэдиссиинэ тэрилтэлэригэр тарҕаныахтара. Аахсыйа Эдэр ыччат уонна СӨ социальнай коммуникациялар министиэристибэлэрин кытта ыытыллар.
Быыстапкаҕа саҕалааччы уонна биллиилээх худуоһунньуктар 40 үлэлэрэ турдулар. Быыстапка үс кэрдиистээх: «Боруҥуй буолуута» («Сумерки»), «Түүн» («Ночь»), «Халлаан сырдыыта» («Рассвет»).
“Я (не) боюсь” быыстапка «Арассыыйа – мин устуоруйам» Историческай түмэлигэр муус устар 17 күнүгэр диэри туруоҕа.
