Муус устар 2-3 күнүгэр Өксөкүлээх Өлөксөй аатынан норуоттар доҕордоһууларын дьиэтигэр "Кыайыы вальса-2022" XII-с бальнай үҥкүүнү толорооччулар бэстибээл-куонкурустара буолан ааста. Бырайыак ааптара - СӨ култууратын Үтүөлээх үлэһитэ Михаил Захарович Сивцев.
"Бырайыакка хас сыл ахсын 7 саастарыттан 85-р диэри 150 тиийэ ахсааннаах бааралар кытталлар. Хас биирдии сааһынан бөлөххө туһунан бырагырааммалаах буолар. Ордук көхтөөх кыттааччыларынан үлэлээбэт биэнсийэлээхтэр буолаллар. Кинилэргэ үҥкүү - көрсүһэр сирдэрэ, олус үчүгэй сынньалаҥ, чөл буолуу, баһаам иэнийии уонна көтөҕүллүүлээх сүргэ. Эр дьон маҥан ырбаахыны, хара силиэти уонна бүрүүкэни, оттон дьахталлар 50-60-с сыллардааҕы былааччыйалары кэтэллэр. Кинилэр наһаа астык көстүүмнэри тигэллэр, эрэпэтииссийэни көтүппэккэ гына сатыыллар, тоҕо диэтэр, үҥкүү бырагырааммата кинилэр эдэр саастарыттан кэллэҕэ. Үҥкүү көмөтүнэн биһиги эдэр сааспытын, дойдубут устуоруйатын саныыбыт уонна эдэр эрдэҕинээҕибитин ахтан кэлэбит. Онон, уруккубут курдук омуннаах-төлөннөөх уонна бэһиэлэй ыччат сааспытыгар түһэбит", - диэн Михаил Захарович ахтар.
Бастакы этап бэстибээл эрэгийиэннээҕи кииннэригэр, Амма, Нам нэһилиэктэригэр, Уус Алдан уонна Мэҥэ Хаҥалас улуустарыгар буолла. Бу кииннэргэ чугас эргиннээҕи нэһилиэктэртэн кыттааччылар тиийбиттэрэ. Онтон түмүктүүр куонкурус Дьокуускай куоракка буолла.
Куонкурус бырагыраамматыгар маннык былыргы бальнай үҥкүүлэр киирдилэр: "Сударушка", "Русский лирический", "Падеграс", "Падеспань", "Вальс-Гавот", "Краковяк", "Тустеп" уо.д.а. Маны таһынан, төрүт аспект эмиэ баар - СӨ култууратын үтүөлээх үлэһитэ Августина Федоровна Клакинова туруорбут "Якутяночка" үҥкүү.
Өксөкүлээх Өлөксөй аатынан норуоттар доҕордоһууларын дьиэтин пресс-сулууспата суруйуутуттан
