«Ыраахтааҕы дьаамсыктарын суолларынан» (По следам государевых ямщиков)» этноквест буолан ааста

Муус устар 9-10 күннэригэр, Дьокуускай–Табаҕа–Төхтүр–Уулах Аан–Бокуруоскай морсуруутунан, «Ыраахтааҕы дьаамсыктарын суолларынан» (По следам государевых ямщиков)» этноквест буолан ааста. Маннык суолу түбэһиэх талбатахтара, бу – Иркутскай-Дьокуускай пуочта тыраагын былыргы ыстаансыйаларын сирдэрэ. Саха сирин олохтоохторугар икки аҥаар үйэ тухары бу морсуруутунан пуочта уонна мал-сал эгэлгэтэ кэлэр этэ.

Кыттааччыларынан 10-нуу үөрэнээччилээх 5 оскуола оҕотун хамаандата буоллулар: Дьокуускай куорат 13№ Орто оскуолата «Дьокуускай дьаамсыктара», Табага орто оскуолата «25 биэрэстэ», Хаҥалас улууһун Төхтүр орто оскуолатын «Төхтүр дьаамсыктарын тыаһа», Улахан Аан орто оскуолатын «Дьэр дьаамнара» уонна Бокуруоскай 4№ орто оскуолатын «Дьаамсыктар сыдьааннара».

Тэрээһини үөрүүлээхтик арыйыы Дьокуускай куоракка дьаамсыктар болуоссаттарыгар буолла.

Этноквест бырагыраамата олус кэрэхсэбиллээхтик табыллыбыт, кэм-кэрдиис массыынатыгар олорсон, кыттыбыт дьон бары былыр ааспыт күннэргэ сылдьан кэлбит курдук сананна.

Оҕолор этнографическай дьыктаан суруйдулар, хамаандаларын билиһиннэрдилэр, дьаамсыктар былыр олорон ааспыт сирдэрин кэрийдилэр, түмэллэргэ сырыттылар, часовнялары көрдүлэр, дьаамсыктар былыргы ырыаларын үөрэттилэр уонна «Переходная полька» диэн былыргы үҥкүүнү үҥкүүлээтилэр.

Этноквест кэмигэр «Ямские бубенцы», «Ямская гармонь», «Бубенцы над Леной» уонна «Ямщицкий перезвон» дьаамсыктар сыдьааннарын ансаамбыллара норуодунай ырыалары толордулар.

Бырайыак тэрийээччитинэн «Потомки государевых ямщиков» СӨ уопсастыбаннай тэрилтэтэ буолла, ааптар – Ирина Стрекаловская.

Тэрээһин сүрүн сыала-соруга: эдэр көлүөнэни Орто Ленаҕа олорбут ыраахтааҕы дьаамсыктарын устуоруйатын уонна духуобунай нэһилиэстибэтин кытта билсиһиннэрии.

Өксөкүлээх Өлөксөй аатынан норуоттар доҕордоһууларын дьиэтин пресс-сулууспата иһитиннэриититтэн