«Иэйии» - норуот вокальнай ансаамбыла. Манна сахалар ааттарын ааттатар, дьүрүскэннээх, ылбаҕай ырыалардаах талааннаах кыргыттар бааллар.
Кинилэр кэнсиэртэригэр култуура уораҕайдара куруук толору буолааччылар. Ырыа-тойук куттаах саха киһитэ төрөөбүт тылынан нарын-намчы дорҕооннору истиэн баҕарар. Оттон бу кэллэктиипкэ ыллыыр Туйаара Неустроева уонна Анна Семенова толорууларын норуот сөбүлээн, долгуйа, сылаанньыйа истэр.
Туйаара – «Якутскэнерго» хампаанньа ЗЭС тэрилтэтин үлэһитэ. Кини – Уус-Алдантан төрүттээх. Оттон Анна – Мииринэй оройуонун дьаһалтатын култуураҕа управлениетыгар үлэлиир. Киэҥ Ньурбаттан кииннээх-хааннаах. Туйаара уонна Анна “Иэйэр кутум – ырыа” диэн ааттаах биһирэми тосхотуохтара.
Бу кыргыттар кэнсиэртэрин «Кустук» норуот ансаамбыла, «Күбэйэ» бөлөх үҥкүүһүттэрэ, оҕо-аймах «Чуораанчык» ансаамбыла, «Айылгы» эстрада кэллэктиибэ, «Ситим» сахалыы уус-уран айымньы бөлөҕө киэргэтиэхтэрэ.
Дьэ, олус талааннаах саха ыччаттара муус устар 23 күнүн киэһэтигэр “Алмаас” култуура уораҕайыгар ыллыахтара-туойуохтара, үҥкүүлээн битийиэхтэрэ.
Мииринэй олохтоохторо кэнсиэркэ кэлэн сүрэххитин манньытыҥ, санааҕытын дьайҕардыҥ.
Станислав Алексеев. Мииринэй куората. Ааптар хаартыскаларыгар «Иэйии» ансаамбыл
