Ыам ыйын 3 күнүгэр, Саха норуодунай артыыстара Екатерина, Алексей Егоровтар «Сырдык сүүрээн» оҕо образцовай эстраднай ырыа устуудьуйата «Сырдык сүүрээн сулустардыын» диэн кэнсиэр көрдөрдө.
Саха эстрадатын артыыстарын кытта устуудьуйа оҕолоро сыанаҕа тэҥҥэ тахсан ыллыыр бырайыактара быйыл 4-с төгүлүн ыытылынна.
«Биһиги оҕону 7 сааһыттан ылабыт. Үлэлиир сирбитин, Өксөкүлээх Өлөксөй аатынан норуоттар доҕордоһууларын дьиэтин наһаа сөбүлүүбүт. Ыытар тэрээһиннэригэр кыттыыны ылабыт. Маны таһынан, биһиэхэ бэйэбитигэр туспа бырайыактардаахпыт, олортон үгүстэрэ Саха НХИК пуондатыгар бааллар. Үлэбитигэр бэйэбит култуурабыт духуобунай өрүтүн тутуһа сатыыбыт. Оҕо куруутун сайдан иһиэхтээх. Бу күүстээх бэйэни бэриниини ирдиир.
Биһиги куруутун бырайыакпытыгар, эбиитин төлөбүрэ суох кыттар Эстрада тыйаатырын артыыстарыгар улахан махталбытын тиэрдэбит», - диэн «Сырдык сүүрээн» устуудьуйа салайааччыта Алексей Егоров кэпсиир.
Эдэркээн артыыстары кытта Далаана, Василий Еремеев, Бүөккэ Бөтүрүөп, Сахая, Варя Ларионова, Милена Борисова уонна даҕаны атын сулустар кыттыыны ыллылар. Оҕолор сыанаҕа олус эрэллээхтик туттан-хаптан сырыттылар. Кинилэр көннөрү ыллаабакка эрэ үҥкүүлээннэр, бэртээхэй көстүүнү көрдөрдүлэр. Репертуары талыы уонна артыыстары кытта биир сөбүлэҥҥэ кэлии, уһун көдьүүстээх бэлэмнэнии уонна бу түмүктүүр кэнсиэр устуудьуйа иитиллээччилэрэ улахан үлэһиттэрин көрдөрдө. Хас биирдии нүөмэр бэйэтэ туспа испэктээкил курдук буолла.
«Сырдык сүүрээн» оҕо образцовай эстраднай ырыа устуудьуйатыгар айымньылаах ситиһиилэри уонна Арассыыйатааҕы, норуоттар икки ардыларынааҕы сыанаҕа тиийэн, чаҕылхай кыайыылары ылалларыгар баҕарабыт.
Өксөкүлээх Өлөксөй аатынан норуоттар доҕордоһууларын дьиэтин пресс-сулууспата сырдатыытыттан
