«Туой-Хайа-2022» Өрөспүүбүлүкэтээҕи ырыа үбүлүөйдээх күрэһин кыайыылаахтара – Петр Пестерев уонна Сайаана Неустроева. Икки Гран-При! Быйыл ырыа күрэһэ оҕолорго (8-17 саас) уонна улахан дьоҥҥо (18-25 саас) ыытылынна. Маннык тэрээһин табылынна диир оруннаах.
Кэм-кэрдии түргэнник да ааһар эбит. «Туой-Хайа» эстрада эдэр талааннарын күрэһэ быйыл 30-с төгүлүн ыытылынна. Бу ырыа күрэһигэр эдэр ырыаһыттар киэҥ-нэлэмэн Сахабыт сирин араас муннуктарыттан кытыннылар. Орто-Халыматтан Аммаҕа, Чурапчыттан Ньурбаҕа тиийэ. Мин санаабар, «Туой-Хайа» – Мииринэйгэ ыытыллар саамай сүҥкэн, кыраһыабай, дьэрэкээн, истиҥ, иһирэх тыыннаах ырыа бырааһынньыга.
Быйылгы эстрада күрэһэ бастыҥнары тургутар кэнсиэрэ ыам ыйын 28 күнүгэр Арыылаах сэлиэнньэтин «Туой-Хайа» култуура Дьиэтигэр буолбута. 34 уолаттар уонна кыргыттар бэйэлэрин талааннарын туох баар кыахтарынан көрдөрдүлэр.
Гала-кэнсиэрт ыам ыйын 29 күнүгэр, Мииринэй куоратыгар, «Алмаас» култуура дыбарыаһыгар ыытылынна. «Алмаас» уораҕайын үктэлигэр кыайыылаахтары чиэстээһин буолла. «Туой-Хайа-2022» эстрада бэстибээлин муҥутуур кыайыылааҕар (улахан дьоҥҥо), Хаҥалас улууһун Хоточчутун уолугар Петр Пестеревка бириэмийэ – 200 тыһыынча солкуобай тигистэ.
Кыра оҕолорго Гран-При (100 тыһыынча солк.) хаһаайкатынан Дьокуускай куорат 31 №-дээх орто оскуолатын онус кылааһын үөрэнээччитэ Сайаана Неустроева буолла.
Үбүлүөйдээх ырыа күрэһин кыайыылаахтарыгар биһиги мииринэйдэр истиҥ эҕэрдэбитин тириэрдэбит. Өссө да кэлэ туруҥ, саха ырыатын туругурдааччылар биһиэхэ - Мииринэйгэ!
Кэрэ ыччат, кэрэ ырыа
Станислав Алексеев. Мииринэй куорат. Ааптар хаартыскалара.
