Сахабыт омугун сайдар суолун торумнуур, төрөөбүт тылбыт үрүҥ тыынын өллөйдүүр тапталлаах «Кыым» хаһыаппыт бар дьону түмэр, олоҕу хамсатар ураты күүстээх. Хаһыат бэс ыйын 9-c күнүгэр Дьокуускай куорат «Арчы дьиэтэ» духуобунай култуура киинигэр самаан сайыны айхаллыыр, үрүҥ түүнү уруйдуур «Үрүҥ түүн кыыма» диэн бэртээхэй дьоро киэһэни тэрийдэ.
Бу бастакы ураты тэрээһиҥҥэ «Кыым» хаһыат, «Күрүлгэн» уонна «Байдам» сурунааллар дьоруойдара, доҕотторо уонна сүгүрүйээччилэрэ мустаннар, сырдык санаа кыымын сахтылар, ырыаны-үҥкүүнү көҕүлүттэн туттулар. Ыалдьыттары аламаҕай бэйэлээх кыргыттар көрүстүлэр, ситии тутан салама баайтардылар, сиэтэн илдьэн быыппах, алаадьы амсаттылар.
Тэрээһин аан туомун алгысчыт Виктор Игнатьев-Байылыат толордо. Кини, аал уокка ас кээһэн, хаһыат кэскилэ өссө кэҥиирин, тэрилтэ аата өссө үрдүүрүн туһугар Үрдүк Айыылартан көрдөстө, үүнүүнү-сайдыыны түстүүр ытык тылларын ымыы гынан көтүттэ.
Дьоро киэһэҕэ кэлбит дьон, бэриллибит түгэни мүччү туппакка, бэс ыйын 6 күнүттэн 16 күнүгэр диэри ыытыллар сүүйүүлээх уонна чэпчэтиилээх сурутууга кыттыстылар, хас биирдиилэрэ бэлэх тутан үөрдүлэр-көттүлэр.
Сахалыы чэй иһии култууратын, сиэрин-туомун тарҕатааччы, «Якутский чайный дом» бырайыагынан Арассыыйа бэрэсидьиэнин гранын кыайыылааҕа, «Чай кучу в культуре народа саха» монография ааптара Туйаара Григорьева-Кучу Туйаара мустубут дьону саха кучу чэйинэн күндүлээн, тэрээһин саҕаланыаҕыттан бүтүөр диэри эйэргэһии, сэһэргэһии сылаас эйгэтэ тэрилиннэ. СӨ социальнай сулууспаҕа туйгуна, РФ уопсай үөрэхтээһиҥҥэ бочуоттаах үлэһитэ, СӨ сахалыы остуол оонньууларыгар федерация чилиэнэ Капиталина Алексеева аттыгар хаамыска, хабылык оонньонно.
Үрүҥ түүҥҥэ үктэммит үтүөкэн кэммитинэн бар дьону норуот дьокутаата, «Ил Түмэн» бэчээт дьиэтин салайааччыта Мария Христофорова, «Ситим медиа-бөлөх генеральнай дириэктэрэ Владимир Степанов, «Ситим медиа-бөлөх толорооччу дириэктэрэ Николай Христофоров эҕэрдэлээтилэр.
Тэрээһин соһуччу уонна долгутуулаах түгэнинэн «Кыым» хаһыат, «Күрүлгэн» уонна «Байдам» суруналыыстарын кытта билсиһии, алтыһыы буолла. Хаһыат сүрүн эрэдээктэрэ Иван Гаврильев хас биирдии үлэһитин уратытын, суруйар хайысхатын, ситиһиитин дорҕоонноохтук билиһиннэрдэ. Ааҕааччылар сөбүлүүр суруналыыстарын ытыс тыаһынан көрүстүлэр, хаартыскаҕа түһэрдилэр.
«Кыым» хаһыат эрэллээх доҕотторо: СӨ норуодунай суруйааччыта, ыытааччы Наталья Михалева-Сайа, «Саха Кэнгириэс» уопсастыбаннай тэрилтэ салайааччыта, Өрөспүүбүлүкэтээҕи лиссиэй-интэринээт дириэктэрэ Иван Шамаев, Өрөспүүбүлүкэтээҕи олоҥхо ассоциациятын салайааччыта Февронья Шишигина, Сахалыы бикипиэдьийэ дьаһабыла, СӨ Тылы сайыннарар сүбэтин чилиэнэ Николай Павлов-Халан, ыытааччы уонна артыыс Ньургун Бэчигэн, урбаанньыт, уопсастыбанньык Семен Оготоев бар дьоҥҥо ис сүрэхтэн тахсар истиҥ эҕэрдэлэрин анаатылар.
Дьоро киэһэни «Туймаада» судаарыстыбаннай ансаамбыл, СӨ үтүөлээх ырыаһыта Тамара Попова, СӨ култууратын туйгуна Аркадий Николаев-Эрхаан, СӨ төрүт олохтоох аҕыйах ахсааннаах хотугу омуктар тыйаатырдарын артыыската, СӨ култууратын туйгуна Синильга, «Арчы» духуобунай култуура киинин уус-уран салайааччыта, этно-ырыаһыт Кыталы Куо, СӨ култууратын үтүөлээх үлэһитэ, мелодист Алексей Калининскай-Луҥха Өлөксөй ылбаҕай ырыаларынан киэргэттилэр.
Импровизатор-толорооччу, экспериментатор-маастар, «Кыл саха» төрүт дорҕоон бөлөҕүн солиһа Руслан Габышев ох сааны тыыннаахтыы уонна электроннай барыйаанынан ыллатан, кырыымпаҕа оонньоон Арчы дьиэтигэр түҥ былыргы алыптаах эйгэни үөскэттэ.
Кэтэһиилээх Туймаадабыт ыһыаҕа чугаһаабытынан, тэрилтэ эдэр үлэһиттэрэ Ольга Неустроева «Хотой» саха таҥаһын брендин көрүөхтэн кэрэ таҥастарын кэтэн хаамтылар. Олохторугар аан бастакытын маннык хаамыыга кыттар эдэр уолаттар уонна кыргыттар, долгуйууларын биллэрбэккэ, мааны тигиилээх таҥастары киэн тутта көрдөрдүлэр, көрөөччү кэрэхсэбилин ыллылар.
"Сааһырыыны бытаардыахха" диэн девизтээх, эти-сиини кытта үлэлэһэр чөл олоҕу өрө тутааччы, 68 саастаах Полина Находкина-Победа эдэр да дьон кыайан оҥорбот уустук хамсаныыларын көрдөрөн бар дьону улаханнык сөхтөрдө. Кини санаатын, Анастасия Габышева-Сыдьаайа салайааччылаах «Сыдьаайа» үҥкүү киинин «Айыы саас» бөлөҕө уоттаах-күөстээх үҥкүүлэринэн өссө төгүл бигэргэттэ.
Дьиҥ сахалыы куттаах дьоро киэһэ СӨ үтүөлээх этээччитэ Марта Николаева тутатына хоһуйуулаах оһуохайынан түмүктэннэ. Ити курдук кыымтан төлөн саҕыллар, төлөнтөн кутаа кытыастар. Кыым хаһыат бар дьону түмэр, олоҕу хамсатар!
Күндү Сахабыт сирин олохтоохторун бэс ыйын 16 күнүгэр диэри, бэйэҕитигэр уонна чугас дьоҥҥутугар «Кыым» хаһыаты, «Күрүлгэн» уонна «Байдам» сурунааллары сурутаҥҥыт, чэпчэтиинэн туһанар уонна сүүйүүлээх оонньууларга кыттар үтүөкэн түгэни куоттарымаҥ диэн ыҥырабыт!
Бу тэрээһини ыытарга көмө буолбут Дьокуускай куорат «Арчы дьиэтэ» духуобунай култуура киинин дириэктэригэр Лариса Константиновна Андрееваҕа уонна киин бары үлэһиттэригэр махтанабыт.
Тэрээһини сырдатта Күндэли
Сэҥээриилэр