Үөһээ Бүлүү оройуонугар, Түгэхтэй диэн көрүөхтэн кэрэ ытык сиргэ Олоҥхо Ыһыаҕа саҕаланна.
Үгэс быһыытынан, киирии ааркаҕа хас биирдии ыалдьыты арчылыыр сиэринэн-туомунан көрүстүлэр. Дьон уокка сылгы сиэлин быраҕан, Үрдүк Айыылартан үүммүт сылга этэҥҥэ буолууну, уйгу-быйаҥ дьылы көрдөһөллөр, өйдүүн-санаалыын чэбдигирэллэр. Сиэри-туому ааһаат, дьон-сэргэ киин трибунаҕа «Хотун Бүлүү – Олоҥхо Ыһыаҕа» үөрүүлээх аһыллыыны көрө тиийдилэр.
Санатар буоллахха, үбүлүөйдээх 15-с Олоҥхо Ыһыаҕа быйыл бэс ыйын 20-21 күннэригэр ыытыллар. Бу үтүө үгэскэ кубулуйбут бырааһынньыкпыт өрөспүүбүлүкэ 100 сылыгар биир дьоһун тэрээһининэн буолар. Бу сылга бырагыраамаҕа «Олоҥхо сиригэр-уотугар ЮНЕСКО шедеврдарын көрсүү» норуоттар икки ардыларынааҕы бэстибээл киирдэ.
Үөһээ Бүлүүгэ ыытыллар Олоҥхо Ыһыаҕар барыта холбоон 100 култуурунай, сиэр-туом уонна успуорт тэрээһиннэрэ киирдилэр. Хамсык саҕаланыаҕыттан бу дьоһун тэрээһин кэтэхтэн холбонуута суох, толору ыытыллан эрэр. Быһа холоон 15 тыһ. тахса киһи кыттыыны ылыахтаах.
