Буоларын курдук, ыһыах сүрүн бэлиэтинэн уонна киэргэлинэн хойуу сэбирдэхтэрэ намылыйбыт, уран оһуордардаах сүдү Аал Луук мас буолар. «Олоҥхо Ыһыаҕа-2022» Аал Луук маһын "Уран" дизайн-устуудьуйата толкуйдаан, оҥорон таһаарбыт.
Сүүнэ тутууну дьэндэппит "Уран" дизайн-устуудьуйа генеральнай дириэктэрэ, Саха сирин уонна Арассыыйа худуоһунньуктарын сойууһун чилиэнэ, СӨ култууратын туйгуна Вячеслав Васильевич Яроевтыын кэпсэттим.
- Вячеслав Васильевич, үтүө күнүнэн, ыһыахтарынан эҕэрдэ! Олоҥхо ыһыаҕын биир сүдү бэлиэтин, Аал Луук маһы эһиги тэрилтэҕит төһө өр оҥордо?
- Махтал! Эһиэхэ ис сүрэхтэн Үрүҥ тунах ыһыаҕынан эҕэрдэ! Маһы аҥаардас тутуутугар, быһа холуйан, биир сыл кэриҥэ барар.
- Үөһээ Бүлүүгэ буола турар Олоҥхо Ыһыаҕын Аал Луук маһын көстүүтэ олус талба, сиэдэрэй. Дьэ, туох суолталааҕый?
- Аал Луук мас ханна да биир өйдөбүллээх буолар. Ол эрээри, сир-сир аайы олоҥхолоро уратылаах буолар. «Хабытта Бэргэн» олоҥхону ааҕа олордохпуна, Аал Луук мас көстүүтэ өйбөр-санаабар бэйэтэ киирэн кэлбитэ. Аал Луук мас суолтатын олоҥхону аахтахха, эбэтэр иһиттэххэ эрэ үчүгэйдик өйдүүгүн.
- Ааспыт сыллардааҕы Олоҥхо ыһыахтарын Аал Луук мастарын үгүс аҥаарын эмиэ эһиги оҥорбуккут. Быйылгы сүдү маспыт уруккулардааҕар туох атыннаах буолла?
- Хас айбыт маспын сылтан сыл аайы тупсарыахпын баҕарабын, ол иһин саҥаттан саҥа идиэйэни көрдүүбүн. Син биир хартыына суруйар курдук. Бу мас сүрүн уратыта - тутуутугар аныгы технологиялары туттуу. Ол курдук, пластигынан лабааларын дьиҥнээх курдук сыбаан, чочуйан-оҥорон таһаардыбыт. Уонна ити эриэккэс сэбирдэхтэрэ тыалга наһаа үчүгэйдик тыаһыыллар.
- Олоҥхо Аал Луук маһын оҥорууга ханнык матырыйааллары туһанныгыт?
- Тутта сатаатахха, матырыйааллары барытын да туттуохпутун син. Аал Луук мас оннук дириҥ уонна баай ис хоһоонноох. Ону барытын өссө тупсаран, чочуйан уонна ситиһэн иһэр киһи диэх курдукпун.
- Уопсайынан, Аал Луук маһы оҥоруу кылгас устуоруйатын баһаалыста билиһиннэр. Дизайнын ким толкуйдаата? Тутууга кимнээх үлэлээтилэр?
- Бастакы толкуйдааһына, этиллибитин курдук, олоҥхону ааҕыыттан төрүүр. Онтон эскииһин хайдах буолуохтааҕын, туох матырыйаалы туттуохпун баҕарарбын бэйэм толкуйдуубун, ол кэнниттэн уопсай сүбэнэн бырайыагын оҥоробут. Оттон олоччу тутууга элбэх маастар үлэлэһэр эрээри, биир сүрүн эппиэттээх, эрэнэр киһибинэн бэйэм бииргэ төрөөбүт убайым, мас ууһа Василий Васильевия Яроев буолар.
- Аал Луук маспыт толкуйдаабыккыт курдук 100% табылынна дии санаатыгыт дуо? Аныгыскы сырыыга үлэ хайа өттүн көннөрүөххэ наада дии санаатыгыт?
- Аал Луук маспыт санаа хоту сатанна, табылынна диэхпин сөп эрээри, айар куттаах үлэһит буоламмын, эбиэхпин, киэргэтиэхпин баҕарар баҕа баһаам. «Манан маны оҥоруох хаалбыт, манан маны эбиэх хаалбыт», - диэн санаалар бааллар.
- Инники Олоҥхо Ыһыаҕын Аал Луук маһын, бэлиэр этэр буоллахха, хайдах уларытан-тэлэритэн, тупсаран биэриэххин саныыгын?
- Инникини тымтыктанан көрбүт суох...
- Аҕыйах ыйытыыбар хоруйуҥ иһин махтал! Таһаарыылаах, эриэккэс үлэҕэр саҥа саҕалааһыннары, ситиһиилэри баҕарабын.
- Махтал.
Кэпсэттэ Ираида Коркина-Чугдаара
