Бэс ыйын 20-21 күннэригэр Үөһээ Бүлүү Түгэхтэй диэн көрүөхтэн кэрэ, ытык сиригэр-уотугар Саха АССР төрүттэммитэ 100 сылыгар анаммыт Олоҥхо Ыһыаҕа ыытылынна. Бу дьоһун бырааһынньыкка өрөспүүбүлүкэ бары оройуоннарыттан тыһыынчанан киһи тоҕуоруста. Маны сэргэ, үгүс ыалдьыт Арассыыйа куораттарыттан уонна аан дойду хас даҕаны судаарыстыбатыттан кэлбитэ биллэр.
Ыһыах түһүлгэлэригэр 100 тахса тэрээһин ыытылынна – «Хардааччы Бэргэн» олоҥхо-испэктээкил премьерата, олоҥхону уус ураннык ааҕыыга өрөспүүбүлүкэтээҕи марафон, тимир уустара, маастардар, оһуохайдьыттар, ат симэҕин күрэхтэрэ, «Хотой Айыы» тыыннаах муусука рок-кэнсиэрэ, төрүт успуорт көрүҥнэригэр күрэхтэһиилэр уо. д. а. Өрөспүүбүлүкэбит улуустарыттан 300 тахса олоҥхоһут саха героическай эпоһын толорон, бастыҥ олоҥхоһут аатын ылыы иһин күрэхтэстилэр.
Олоҥхо ыһыаҕын биир сүрүн тэрээһининэн Саха АССР төрүттэммитэ 100 сылыгар, Арассыыйа норуоттарын култуурунай нэһилиэстибэлэрин Сылыгар анаммыт «ЮНЕСКО шедеврдарын көрсүһүүтэ» IV Норуоттар икки ардыларынааҕы бэстибээл буолла. Бэстибээл чэрчитинэн маастар-кылаастар, кэнсиэр уонна М.К. Аммосов аатынан норуоттар икки ардыларынааҕы симпозиум ыытылыннылар.
«Күндү өрөспүүбүлүкэ уонна төрүт дойдум Үөһээ Бүлүү олохтоохторо, Арассыыйаттан уонна аан дойду судаарыстыбаларыттан кэлбит ыалдьыттар, эһигини Олоҥхо Ыһыаҕа ситиһиилээхтик түмүктэммитинэн эҕэрдэлиибин.
Икки күн устата биһиги олоҥхону иһиттибит, оһуохайдаатыбыт, тимир уустара үлэлэрин көрдүбүт. Уонна саамай сүрүнэ, уларыйа сылдьар халлаан туругун аахайбакка, уонча тыһыынча киһи биир сиргэ мустаммыт сайыҥҥы бырааһынньыкпытын бэлиэтээтибит. Мин ис сүрэхпиттэн төрөөбүт Үөһээ Бүлүүм улууһун олохтоохторугар ыалдьытымсахтарын иһин махталбын биллэрэбин», - диэн СӨ Ил Дархана Айсен Николаев эттэ. Кини ыһыаҕы үөрүүлээхтик сабыы дьоро түһүлгэтигэр олоҥхону толорооччулар уонна оһуохайдьыттар күрэхтэрин кыайыылаахтарыгар наҕараадалары туттартаата.
Маны сэргэ, СӨ Ил Дархана уонна Үөһээ Бүлүү улууһун баһылыга Владимир Поскачин ыһыах бэлиэтин Ытык Дуоҕаны Өймөкөөн улууһун бэрэстэбиитэллэригэр туттарда. Онон, эһиил Олоҥхо ыһыаҕа Өймөкөөн улууһугар ыытыллар буолла. Олоҥхо Ыһыаҕа үгэс быһыытынан оһуохайынан түмүктэннэ.
