Киир

Киир

Ивановскай уобаласка от ыйын 27-31 күннэригэр Андрей Тарковскай аатынан XV-с үбүлүөйдээх Норуоттар икки ардыларынааҕы «Зеркало» киинэ бэстибээл буолуоҕа. Тэрээһин кэмигэр, куонкуруһу таһынан, саха киинэлэрин көрдөрүөхтэрэ.

СӨ Култуураҕа уонна духуобунай сайдыыга миниистирэ Юрий Куприянов бу улахан ситиһии буоларын уонна мантан антах саха киинэтин улахан прокакка таһаарар сорук турарын бэлиэтээтэ. Кини ол туһугар киинэни атын дойдулары кытта кыттыһан уһулууну баһылыахтахпыт диэн этэр. Ити хайысхаҕа хайыы үйэ Казахстаны кытта үлэлэһэргэ дуогабар түһэрсиллэн турар эбит.   

«Зеркало» бэстибээл аһыллыыта Андрей Тарковскай төрөөбүт куоратыгар  Юрьевецкэ буолуоҕа. Үөрүүлээх тэрээһин киинэ маастарын төрөөбүтэ 90 сылыгар аналлаах кэнсиэртэн саҕаланыаҕа.

Сүрүн куонкуруска Арассыыйа, Монголия, Кыргызстан, Болгария, Косово, Грузия, Индия, Германия уонна Великобритания тоҕус киинэтэ кыттыаҕа. Ону таһынан, уобалас олохтоохторо уонна ыалдьыттара саха режиссердара уһулбут «Вертолет» (режиссер Михаил Лукачевскай), «Нелегал» (режиссер Дмитрий Давыдов), «Нуучча» (режиссер Владимир Мункуев), «Холодное золото» (режиссер Петр Хики), «Ыт» (режиссердар Степан Бурнашев, Дмитрий Давыдов) киинэлэрин көрүөхтэрэ.

Сонун төрдө: Министиэристибэ пресс-киинэ,  «Сахафильм» киинэ хампаанньата

Тарҕат:

Санааҕын суруй