Киир

Киир

Саха сирин А. уонна Н. Посельскайдар ааттарынан балетнай оскуолатын устудьуоннара Иван Одинцов уонна Алисия Пак IX Соҕуруулуу-Африканскай норуоттар икки ардыларынааҕы балетнай күрэскэ боруонса мэтээлин ыллылар. Куонкурус Кейптаун куоракка ыытылынна. Манна 21 дойдуттан 93 үҥкүүһүт кыттыыны ылла.

Оҕолору СӨ Култуураҕа уонна духуобунай сайдыыга миниистирин солбуйаааччыта Марина Силина эҕэрдэлээтэ.

- Кейптауҥҥа ыытыллыбыт куонкуруска Арассыыйа уонна биһиги өрөспүүбүлүкэбит аатыттан Балетнай оскуола устудьуоннара, СӨ култууратын туйгуннара Алисия Пак уонна Иван Одинцов кытыннылар. Кинилэр чахчы даҕаны олус талааннаах ыччаттар, олус элбэх норуоттар икки ардыларынааҕы, бүтүн Арассыыйатааҕы куонкурустарга кыайан, номнуо өрөспүүбүлүкэ сирэйинэн буоллулар. Ити күрэскэ кинилэр куонкурус дириэктэрэ господин Дирк Баденхорст ыҥырыытынан уонна С.А. Усанов аатынан Норуоттар икки ардыларынааҕы балетнай куонкурустар бэрэсэдьиэннэрэ көмөтүнэн кытта барбыттара. Куонкурус түмүгүнэн биһиги артыыстарбыт боруонса мэтээллэрин ылан, 3 истиэпэннээх лауреат аатын сүктүлэр», - диэн Марина Силина кэпсиир.

photo1659436332

Куонкурус кыттааччыларын Германияттан, Швейцарияттан, Испанияттан, Словакияттан, Арассыыйаттан, Соҕуруу Кореяттан, Кубаттан, Бразилияттан уонна Соҕуруу Африкаттан аан дойдутааҕы балетнай ускуустуба биллиилээх диэйэтэллэрэ сыаналаатылар.

Алисия уонна Иван «Классическай үҥкүү», «Аныгы үҥкүү» номинацияларга кытыннылар.

​«Классическай үҥкүү» номинацияҕа Алисия В. Чабукиани хореографиятынан А. Крейн «Лауренсия» балетыттан үҥкүүнү уонна М. Петип хореографиятынан А. Адан «Корсар» балетыттан Одалиска үҥкүүтүн көрдөрбүтэ. Оттон Иван М. Петип хореографиятынан Ц. Пуни «Талисман» балетыттан Вайю диэн Тыал Таҥаратын үҥкүүтүн уонна А. Горскай хореографиятынан Л. Минкус «Дон Кихот» балетыттан Базиль үҥкүүтүн көрдөрбүтэ.

«Аныгы хореография» номинацияҕа иккиэн Алексей Расторгуев хореографиятыгар, Токэ-Ча муусукатынан «Сказка» диэн аныгы нүөмэри толорбуттара.

Балет оскуолатыгар кэпсээбиттэринэн, Алисияны уонна Иваны куонкуруска кытталларыгар А. уонна Н. Посельскайдар ааттарынан Саха сиринээҕи балетнай оскуола дириэктэрэ, уһуйааччыта, СӨ үтүөлээх артыыската Дария Дмитриева бэлэмнээбит.

Саха сириттэн кыттааччылары Соҕурууҥҥу Африканскай Өрөспүүбүлүкэҕэ Арассыыйа Федерациятын Кейптауҥҥа консула А.В. Маленко уонна РФ Генеральнай консульствотын дипломаттара көрсүбүттэр.

СӨ Култуураҕа уонна духуобунай сайдыыга министиэристибэтин пресс-сыантыра сырдатыытыттан

photo1659436351photo1659436351 1photo1659436351 2photo1659436575

Тарҕат:

Санааҕын суруй

Бүтэһик сонуннар

Полина Гагарина