«Кындыкан» айар холбоһук Аан дойдутааҕы төрүт олохтоохтор Күннэринэн эҕэрдэлиир уонна хас биирдии Ийэ Сир олохтооҕор ыҥырар этиилээх!
Биһиги «Кындыкаан» айар бөлөхпүт – үгүс үтүө дьон өйөбүлүнэн олоххо киирбит, номнуо өрөспүүбүлүкэ таһыгар тиийэ биллэр ураты этнобренд. Биһиги, араас эйгэ профессионаллара уонна энтузиастара биир сүбэнэн холбоһон, сүдү сорукпутун ситиһэр туһуттан, өбүгэлэрбит - аҕыйах ахсааннаах төрүт хотугу омуктар тылларын-өстөрүн, үгэстэрин, ураты култуураларын киэҥ эйгэҕэ тарҕатар хас даҕаны уон туспа суоллаах бырайыактары олоххо киллэрдибит!
Оттон биһиги миссиябыт уонна сорукпут – Хоту Дойдуну Араҥаччылааччыны – Кындыкаан персонаһын - Сир ийэ этносимволын - Хоту дойду саҥарар саҥатын Аан Дойдуга иһитиннэрии!
Биһиги түҥ былыргы төрүт хотугу олохтоох норуоттар дьиҥ чахчы Ийэ сир климатическай уонна энергетическай балаансатын харыстаан илдьэ сылдьар, араҥаччылыыр дьонунан буолалларыгар итэҕэйэбит!
Харыстанан кэлбит Хоту дойду үгэстэрэ, култууралара уонна сиэрдэрэ-туомнара аныгы үйэҕэ сүҥкэн суолталаахтар, тоҕо диэтэр, бу ураты көстүүлэр уонна дьайыылар айылҕа тыытыллыбатах уратытын уонна уларыйыытын икки ардын балаансатын харыстыырга төрүт, бөҕө билиини илдьэ сылдьаллар. Ол эрээри, глобальнай кыһалҕаларга Хоту Дойду олохтоохторо төһүү оруоллаахтарын туһунан аһаҕастык билинии суох. Дьиҥинэн ылан көрдөххө, үгүс цивилазациялар үөдүйбүт уонна сүппүт үгүс эпохаларын тухары Хоту Дойду уонна Арктика норуоттара бааллар этэ. Култуура маннык бигэлээх буолуута айылҕа баайыгар-дуолугар, ресурсугар харыстабыллаах сыһыантан бүтүннүү тутулуктаах.
Бүгүҥҥү туругунан, төрүт дьарыктарын үгэс оҥостон олорор аҕыйах ахсааннаах норуоттар архаичнай култуура бэрэстэбиитэллэрэ буолалларын быһыытынан, үгэстэрин харыстыыр буоланнар, бэйэлэрэ үрдүкү аналлаахтар - аан дойду кэбирэх балаансатын Араҥаччылыыр миссиялаахтар. Тоҕо диэтэр, Хоту дойду Сир ийэ планета тирэҕинэн буолар!
Оннук сыалга-сорукка, өбүгэлэрбит алгыстарынан уонна кинилэр кэс тылларын харыстыыр тустаах, араас хайысханы, ол эбэтэр аныгы технологиялары, култуураны тарҕатыыны уонна үүнэр көлүөнэҕэ билии-көрүү контенын холбуур «Кындыкаан» бренд аннынан бэйэбит бырайыактарбытын айан таһаарабыт.
Аан дойдутааҕы төрүт омуктар күннэригэр анаан, биһиги «Кындыкаан» айар холбоһукпут хаартысканан саҥа бырайыагын бэлэмнээтибит. Бу бырайыак нөҥүө биһиги Уһук Хоту уонна Арктика аҕыйах ахсааннаах төрүт омуктарын тылларын, култуураларын уонна үгэс быһыытынан төрүт олорор сирдэрин харыстыырга болҕомтону уурарга ыҥырабыт!
Хаартыскалары өйдөөн көрүҥ, бу айымньылар нөҥүө биһиги көрдөбүт: «Кумах куйаар – аҕыйах ахсааннаах төрүт хотугу омуктар бэйэлэрин төрүт сирдэрин-уоттарын араас төрүөтүнэн сүтэрбиттэрин көрдөрүү метафората. Сыгынньах атахтар айылҕаны кытта ыкса ситими уонна көмүскэлэ суох буолууну көрдөрөллөр. Хараҥа былыттар – айманыы, түрбүөн. Оттон сиргэ тиэхиникэ суола – аныгы цивилизация суола-ииһэ».
Аан дойду Уһук Хоту илдьитин номнуо иһиттэ! Тоҕо диэтэр, айымньы күүскэ саҥарар, ылыннарар, бэйэтигэр умсугутар уонна холбуур, өрүү маннык этэ уонна буолуоҕа даҕаны!
Кындыкаан миссиятын өйөөччүлэргэ махталы кытта
Кындыкаан айар холбоһугун бөлөҕө.
Кындыкаан холбоһук хаартысканан бырайыагын атын хаартыскаларын бу сигэнэн көр: http://kyndykan.com/indigenousday
Фотограф: Антон Кондратьев
Моделлэр: СӨ Орто Халыма оройуонун эбээннэрэ эвены
Fashion makeup стилист: Нинель Данилова
Хаартыскаҕа түһэрии үлэтин куратора: Анна Черемкина
