Ретро истиилин өрө тутааччылар атырдьах ыйын 12 күнүгэр, Өксөкүлээх Өлөксөй аатынан норуоттар доҕордоһууларын дьиэтигэр «Ретро ССРС» ураты дьоро түһүлгэни ыыттылар.
Тэрээһиҥҥэ оччотооҕу тыыны тиэрдэр быыстапка турда. Манна Саха сирин оһуохайга үтүөлээх этээччитэ, СӨ коллекционердарын чилиэнэ, ППО сэкэрэтээрэ, ПП КПРФ чилиэнэ Светлана Сивцева; «Коллекционердар түһүлгэлэрэ» коллекционердар кулууптарын салайааччыта, Дьокуускай куорат уонна Ньурба улууһун коллекционердарын бөлөхтөрүн салайааччыта Эльвира Семенова-Сэргэ Кыыһа Тускулаана; Норуоттар икки ардыларынааҕы уонна Арассыыйатааҕы худуоһунньуктар сойуустарын чилиэнэ, «Айар кут» суруйааччылар сойуустарын чилиэнэ, норуот маастара, СӨ култууратын туйгуна Вера Санникова тус кэллиэксийэлэрин дьон көрүүтүгэр таһаардылар. Манна үгүс ретро истииллээх туттар сэп-сэбиргэл, киэргэллэр, ССРС саҕанааҕы значоктар уо.д.а. көрөөччүлэри кэрэхситтилэр.
Тэрээһин куорат олохтоохторун уонна ыалдьыттарын сэргэх, толору уонна чаҕылхай бырагырааманан үөртэ. СӨ норуодунай артыыһа, Арассыыйа Үтүөлээх артыыһа Афанасий Афанасьев «Сайыҥҥы диско» флеш-моб үҥкүүлээн сэргэхситтэ. Кини твист, макарена, ламбада уонна даҕаны атын астык үҥкүүлэри көрдөрдө. Маныаха, тэтимнээх толорууттан ким даҕаны туора турбата, бары астына-дуоһуйа тэҥҥэ үҥкүүлэһэн, сүргэлэрэ көтөҕүлүннэ.
Дьоро түһүлгэни чаҕылхай талааннаах ыытааччы, олоҥхону толорооччу, "Талаан түһүлгэтэ" суруйарга холонор айар куттаахтар түмсүүлэрин чилиэнэ Вера Цыпандина иилээн-саҕалаан ыытта.
Маны сэргэ, «Айар кут» СӨ эрэгийиэннээҕи хоһоонньуттар уонна кэпсээнньиттэр сойуустарын чилиэннэрэ хомоҕой хоһооннору ааҕан иһитиннэрдилэр. Тэрээһин бириэмэтигэр «Уһун үйэлээх буолуу бириинсиптэрэ» диэн мэдиссиинэ билимин хандьыдаата Ефимова Любовь Николаевна лиэксийэтэ буолла.
Салгыы, көрөөччүлэр 80-90 сыллардааҕы муоданы көрдөрүүттэн олус астыннылар. Оччотооҕу таҥас-сап маанытыттан уонна киһини абылыыр күүстээҕиттэн сөхтүлэр-махтайдылар.
Источник: Өксөкүлээх Өлөксөй аатынан норуоттар доҕордоһууларын дьиэтин пресс-сулууспата
