Киир

Киир

Дьэ, син балачча кэтэһэн-кэтэһэн, бэҕэһээ, атырдьах ыйын 21 күнүгэр, Арассыыйа эстрадатын чаҕылхай сулуһа Полина Гагарина кэнсиэригэр сырыттыбыт.

Бастаан, буоларын курдук, «Туймаада» стадиоҥҥа киириигэ уһун уочарат буолла. Онтон, дьэ, үгүс дьон быыһыгар симиллэн киирэн, оннубутун булан, сүүнэ экраннардаах, киһи хараҕа саатар сандаархай уоттардаах сыананы өрө мыҥаан, субу-субу ырыаһыппыт тахсарын кэтэһэн турдубут.

Дьон-сэргэ мааны сулуспут тахсарын күүтэ туран: «Полина-аа!» - диэн үөгүлээтилэр, быыһыгар таһынан, иһиирэн даҕаны көрдүлэр. Субу буолуох курдук этэ эрээри, саҕаланан испэтэ диэххэ айылаах, баҕар, күүппүт санаабытыгар буолуо...

Онтон эмискэччи «Бу баарбыт!» диэбиттии, улахан тыастаах аппаратуралартан ырыа тыаһаан ньиргийдэ, сүүнэ экраннарга Полинабыт моһуона көһүннэ, сыанаҕа былыттар үрэл гыннылар, онтон-мантан уот-күөс чаҕылыйа түстэ... уонна, көрөөччүлэри ыһыытаппытынан-хаһыытаппытынан, Полина Гагарина көмүстүү кылабачыйар кылгас былааччыйалаах, имигэстик хамсана-хамсана сыанаҕа тахсан кэллэ. Үөрүү-көтүү буолла, стадион иһэ өрө үллэн олордо.

- Миигинниин биир арааспанньалаах улуу киһибит эппитинии: «Айаннаатыбыт!» (“поехали!”) – диэтин кытары, кэнсиэрбит илэ-чахчы уоттаахтык-күөстээхтик оргуйбутунан барда.

Полина Гагарина күүстээх куолаһын илэ истэр олус ураты! Тэлэбииһэринэн көрөр диэн олох атын буоларын дьэ чахчы биллибит ээ! Кинини көрөөччүлэр, истээччилэр чахчы таптыахтарын таптыыллар эбит! Хаһан даҕаны харахтаан көрбөтөх, кулгаахтаан истибэтэх шоубутугар сылдьан, бары туох эрэ дьикти турукка ылларбыт, дьол биир үтүө түгэнигэр, олох биир сырдык тыыныгар тиксибит курдук буоллубут диэтэхпинэ, сыыспатым буолуо.

Бүгүн сарсыарда социальнай ситимнэргэ тарҕаммыт дьон санаата ону чахчы бигэргэттэ. Онно, «Гагариналыын тэҥҥэ космоска көтөн кэллибит» диэн суруллубутугар сүүс бырыһыан сөбүлэһэбит. Ол курдук, чулуу нуучча омук талба талааннаах эдэр ырыаһытын кытта биһиги ханнык эрэ “үһүс үрдэлгэ”, «куйаар киэҥ эйгэтигэр» үктэнэн кэлбит курдук сананныбыт. Хор, ол курдук кини толоруута, күүстээх куолаһа, үҥкүүтэ, хас биирдии сыанаҕа үктэниитэ туспа күүстээх энергетикалаах буолла.

Кинини арыаллаан сылдьар үҥкүүһүттэрин туһунан киһи этэ да барбат. Эчи, хас биирдии хамсаныылара имигэһин, муусуканы кытта биир ураты ситимнээҕин, эриэккэһин! Чочуллубут чороон курдук таһаалаах кэрэчээн кыргыттар, үрдүк, көнө дьылыгыр уҥуохтаах эдэр дьон ырыаһыппытын тула эргичийэ сылдьан үҥкүүлээн, шоу-кэнсиэргэ бэйэлэрин биир сүҥкэн кылааттарын киллэрдилэр.

Полина Гагарина, аны туран, 2-3 ырыаны толороот даҕаны, түп-түргэнник таҥаһын-сабын хаста даҕаны уларыта оҕуста. Эчи, көстүүмнэрэ кини этигэр-сиинигэр сөпкө тып-тап курдук олорон иһэллэр, олох ананан кэлбиттэрин курдук барсаллар. Аны, ырыаһыппыт чочуонай быһыыта-таһаата, имигэһэ, ыллыыр талааннааҕын ааһан, үҥкүүһүттэрин кытта тилэх баттаһан бэртээхэйдик хамсанан иһэриттэн сөхтүбүт.

Гагарина кэнсиэрин бэйэтэ-иилээн саҕалаан ыытта. Хас ыллаан бүттэҕин ахсын, көрөөччүлэри кытта сибээс олохтоон, ылыннарыылаахтык саҥарда-иҥэрдэ, быыһыгар олох-дьаһах туһунан санааларын, үтүө сүбэлэрин эттэ.

Ырыаһыппыт кэнсиэр бүтүүтүгэр хамаандатын дьонугар, үҥкүүһүттэригэр, тыыннаах музыканы толорооччуларыгар, аппаратураҕа олорооччуларга, бэл, киниэхэ таҥаһы аҕыйах сөкүүндэ иһигэр кэтэрдэ охсор кыргыттарыгар махталын биллэрдэ. Онтон быраһаайдаһар тылын этэ туран, Саха сирин көрөөччүлэригэр «маннык сылаастык» көрсүбүттэригэр махтанна уонна «өссө кэлиэҕим» диэн эрэннэрэн, дьон-сэргэ санаатын көтөхтө.

WhatsApp Image 2022 08 22 at 14.24.22WhatsApp Image 2022 08 22 at 14.24.22 1WhatsApp Image 2022 08 22 at 14.24.22 2WhatsApp Image 2022 08 22 at 14.24.22 3 1WhatsApp Image 2022 08 22 at 14.24.22 4WhatsApp Image 2022 08 22 at 14.24.22 5WhatsApp Image 2022 08 22 at 14.24.22 6WhatsApp Image 2022 08 22 at 14.24.22 7

Полина Гагарина кэнсиэригэр сырыытын туһунан сырдатта Ираида Коркина-Чугдаара,
Арина Стручкова хаартыскаҕа түһэриилэрэ
Тарҕат:

Санааҕын суруй