Саҥа 2022-2023 с.с. үөрэх дьылын алгыстаах аартыгын арыйар, Дьоллоох Дьокуускай куораппыт төрүттэммитэ 390, Саха Өрөспүүбүлүкэтэ тэриллибитэ 100, Арчы дьиэтэ духуобунай култуура киинэ арыллыбыта 20 сылларыгар, үс өрөгөйдөөх, үөрүүлээх бэлиэ түгэннэри кытта ыксалатан, Балаҕан ыйын устата – Улуу Суорун ыйыгар алгыстаах тэрээһиҥҥэ, ыҥырабыт.
Ол курдук, бу дьыл о.э. балаҕан ыйын 9 күнүгэр, күнүс 15.00 чаастан, бастакы кылааска аан бастаан оскуола боруогун атыллаабыт оҕолорбутугар, сиэннэрбитигэр, хос сиэннэрбитигэр, кыра чуораанчыктарбытыгар, оскуола оҕолорун, төрөппүттэрин уонна саха тылын, литератураҕа, төрүт култуураҕа уһуйааччыларын кытта биир ситимнээх үлэҕэ сыһыарыллыбыт, Дьокуускай куорат 2-с нүөмэрдээх оскуола учуутала, салайааччы Ольга Михайловна Сивцева уонна ДКК «Арчы дьиэтэ» фольклорга исписийэлииһэ, алгысчыт, арчыһыт Арый-аан анаан-минээн Арчы дьиэтин иһинэн тэриллибит “Алгыс туһаайыыта” билии - алгыстаах аартыктарын сэгэтэр тэрээһинэ ыытыллар.
Саҥа үүммүт үөрэх сылыгар, кэнчээри ыччаттарбыт, саха буолан сандааран, киһи буолан килбэйэн, үөрэх-билии ситиһиилэринэн кынаттанан, Ийэ дойдуларыгар туһалаах дьон буоллуннар диэн алгыс туһаайыытынан оҕолорбутун алгыс иитигэр киллэрэн, Билии ыллыгар сиэтэн, Билии киэҥ аартыгар атаарар күммүт тосхойор. Бу тэрээһиҥҥэ оҕолор Арчы дьиэтин көрөн-истэн билсиэхтэрэ, алгыс туһаайыытынан алҕаныахтара, арчыланыахтара.
Күндү төрөппүттэр! Уһуйар учууталлар! Эдэр устудьуон оҕолор! Бу тэрээһиҥҥэ күргүөмүнэн кэлэн кыттыһан, күө-дьаа буолан, ыччаттарбытын Билии киэҥ аартыгар киллэриэххэйиҥ!
Билсэр тел.: 321323, 89644150424, 89142271368.
