«Надежда» култуура дьиэтэ Дьокуускай үбүлүөйүгэр анаммыт тэрээһинэ

Дьокуускай куораппыт үбүлүөйдээх күннэрин бэлиэтиир үгүс, эгэлгэ тэрээһин буолан ааста. Биһиги киин сирдэргэ туох, ханна уонна хаһан буолбутун бары билэ-көрө, истэ сылдьабыт. Ол туһунан улаханнык сырдатыы даҕаны ирдэммэт диэххэ сөп. Дьэ, маннык «һуй-һай» быыһыгар куораппыт таһынааҕы бөһүөлэктэргэ эмиэ сэргэх тэрээһиннэр ыытыллыбыттарын билиэх, сэҥээриэх тустаахпыт.

Ол курдук, балаҕан ыйын 10 күнүгэр, Пригороднай бөһүөлэк «Надежда» сынньалаҥ киинигэр «Үбүлүөйгүнэн, тапталлаах куоратым!» диэн Дьокуускай куорат 390 сылыгар уонна көмүс күһүҥҥэ анаммыт үөрүүлээх тэрээһин буолан ааста.

Дьоҥҥо-сэргэҕэ биллэрин курдук, күһүн барахсан чуумпурууну, силбиктээх ардаҕы уонна курус туругу кытта ситимнээх. Ол эрээри, бу тэрээһиҥҥэ кыттыбыт артыыстар көрөөччүлэри биллэ сэргэхситтилэр.

Бастаан, 22-с нүөмэрдээх «Жемчужинка» уһуйаан «Вдохновение» ансаамбыла Сайыына «Здравствуй, Якутск» ырыатыгар үҥкүүлээн, кэнсиэри үөрүүлээхтик саҕалаата.

Тэрээһин сүрүн ыалдьыттарынан «АйАрт» айар-суруйар дьону көҕүлүүр өрөспүүбүлүкэтээҕи уопсастыбаннай тэрилтэ айар куттаахтара буоллулар. Кэнсиэр кэмигэр түмсүү салайааччыта Диана Сутакова-Дайаана Куо уонна эдэркээн ааптар Светлана Черкасова күһүн туһунан хоһооннорун ааҕан иһитиннэрдилэр. Оттон ураты куоластаах, чаҕылхай талааннаах ырыаһыттар, хоһоонньуттар, эдэр ааптардар, түмсүү актыыбынай кыттыылаахтара Виктор Харлампьев, Петр Кычкин-Сайылык Бүөтүрэ, Марина Румянцева, Мария Андреева, Маайа Григорьева, Михаил Слепцов уонна Инна Донская-Дайаана ылбаҕай ырыаларын бэлэхтээтилэр.

Салгыы, Дмитрий Титов «Белые розы» хит ырыанан тэтимнээх үҥкүүнү көрдөрдө. Кэнсиэр Дьокуускай 12-с нүөмэрдээх Орто оскуола үөрэнээччилэрин толорууларыгар чаҕылхай флешмобунан түмүктэннэ. Көрөөччүлэр бука бары олус астыннылар, сүргэлэрэ көтөҕүлүннэ, оттон эдэр, талааннаах артыыстартан тула барыта сырдаан, тупсан ылбыкка дылы буолла.

Маны сэргэ, кэнсиэр чэрчитинэн, Пригороднай нэһилиэк көхтөөх олохтоохторун наҕараадалаатылар. Ол курдук, «Дьокуускай куорат сайдыытыгар үтүө суобастаах үлэтин уонна сүҥкэн кылаатын иһин» үбүлүөйдээх бэлиэлэри туттартаатылар.

Тэрээһин кэмигэр, нэһилиэк олохтоохторугар «Осенний каламбур» норуодунай, маассабай, күһүҥҥү тиэмэҕэ сыһыаннаах оонньуулар, күрэхтэр ыытылыннылар. Хараҕы симэн туран хортуосканы түргэнник хахтыырга, оҕурсуну илии көмөтө суох сиэһиҥҥэ, «күһүҥҥү булт», «үүнүүнү аах», «күрдьэҕи түргэнник хап», «ынаҕы ыыбыт» уо.д.а. бэрт интэриэһинэй күрэхтэр тэрилиннилэр.

Ордук көрүдьүөс оонньуунан «Кууруссаны ситии» күрэх буолла. Кыттааччылар харахтарын баайтаран баран, кууруссаны эккирэттилэр. Көрөөччүлэр бары күлэн быардара «быста сыста» диэтэхпитинэ, сыыспаппыт буолуо.

Тэрээһин хас биирдии ыалдьыта сүүйтэриитэ суох «Бырааһынньыктааҕы оонньотуу» лотереяҕа кытынна. Ол курдук, кэлбит дьоҥҥо минньигэс ас, мульфильмҥа билиэт, куухуна мала уонна даҕаны атын интэриэһинэй бириис тигистэ. Манна сүрүн бириистэринэн вафельница, тиэрмэс, фен, мэдиссиинэ тэрилтэлэригэр уонна мүөттэн оҥоһуллубут тортка сэртипикээттэр буоллулар.

Тэрээһин сүрүн чааһынан «Күһүн өҥнөрө» (Краски осени) күһүҥҥү дьаарбаҥка буолла. Манна атыы-эргиэн туочукалара, лотереялар, хаартыскаҕа түһэр зоналар уонна оонньуулаах бырагыраамалар тэриллэн үлэлээтилэр. Кыттааччылар олус бэртээхэйдик уонна эриэккэстик атыылыыр сирдэрин киэргэтэн оҥостубуттар. Дьаарбаҥкаҕа киһи хараҕа сүүрэлэһэр үтүө көстүү – кустар, оҕуруот астара, үрүҥ астар, кулинарнай аһылыктар, дьиэҕэ астаныллыбыт тортар, эгэлгэ фрукталар, араас өҥнөөх оҕуруот астара, тууһаммыт, маринуйдаммыт астар, барыанньалар, уус-уран оҥоһуктар уо.д.а. Олохтоохтор үөрэ-көтө оҕуруот аһыттан соҕотуопкалары, үүт аһылыктары уонна бурдук астарын ордук хото атыыластылар.

Түмүккэ, бары кыттааччыларга сыаналаах бириистэри уонна грамоталары туттардылар.

Дьэ, онон, Пригороднай сэлиэнньэ Дьокуускай куорат 390 сылыгар анаммыт «Күһүҥҥү дьаарбаҥката» бэрт сэргэхтик уонна көхтөөхтүк ааста. Көрө-истэ кэлээччи кыратыттан улаханыгар, эдэриттэн эмэнигэр диэри бука бары астыннылар, дуоһуйдулар. «Надежда» сынньалаҥ киинэ өрүүтүн даҕаны көрөөччүлэригэр аана аһаҕас. Түгэнинэн туһанан, тэрийээччилэр «Медиашкола» уонна «Меркурий» тэрилтэлэргэ тэрийиигэ успуонсар буолбуттарын иһин махталларын тиэрдэллэр.