Саха режиссера Илларион Яковлев «Таксист» киинэтэ Baiqonyr VII норуоттар икки ардыларынааҕы кылгас кээмэйдээх киинэ бэстибээлигэр кыайыылааҕынан буолла.
Бэстибээл балаҕан ыйын 7 күнүттэн 11 күнүгэр диэри Казахстаҥҥа ыытыллыбыта. Бу күрэххэ киирбит 200 сайаапкаттан 17 бастыҥ киинэни талбыттара. Оттон «Таксист» лиэнтэ «Бастыҥ киинэ» анал аакка кыайыылааҕынан буолла.
Илларион Яковлевы кытта бэстибээлгэ Арассыыйаттан Настя Коркия «Почти весна» уонна Сергей Батаев «Параллели» киинэлэринэн кыттыбыттара. Оттон өссө биир саха киинэтин режиссера Эдуард Новиков дьүүллүүр сүбэ састаабыгар киирбитэ. Биллэрин курдук, 2018 сыллаахха кини «Тойон Кыыл» киинэтэ Москубатааҕы норуоттар икки ардыларынааҕы киинэ бэстибээлигэр сүрүн бирииһи ылбыта.
