Бүтүн Арассыыйатааҕы идэлээхтэр "Төрөөбүт тыл уонна литэрэтиирэ бастыҥ учуутала" күрэстэригэр Саха сириттэн С.К.Макаров аатынан Чурапчытааҕы гимназия саха тылын уонна литэрэтиирэтин учуутала Гоголева Сардаана Николаевна кытта сылдьар.
Бу күннэргэ күрэс кэтэхтэн ыытыллар түһүмэҕэ түмүктэннэ. Манна дойду араас регионуттан 69 күрэстэһээччи медиавизитката кытынна. Дьүүл сүбэтэ кыттааччылар үлэлэрин таһымын, регион уонна үөрэх кыһатын этнокультурнай уратытын учуоттаан үөрэтэр тус ньымаларын уонна төрөппүттэри кытта үлэлиир уопуттарын сыаналаабыт.
Күрэс сирэй көрсүһүүлээх түһүмэҕэ балаҕан ыйын 11 күнүгэр Ставропольга саҕаламмыт. Манна Сардаана Николаевна «Мэтиэдикэ мастарыскыайа», «Уруок», «Кылаас чааһа» уонна «Маастар-кылаас» тургутууларга бэйэтин сатабылын көрдөрүөхтээх.
Сахабыт сирин бары олохтоохторун биир дойдулаахпыт, оҕолорбутугар саха тылын уонна литэрэтиирэтин үөрэтэр үрдүк аналлаах учуутал Сардаана Николаевнаҕа балаҕан ыйын 16 күнүгэр түүн 24.00 чааска диэри бу сигэнэн https://vk.com/wall-213970634_594 киирэн куоластыыргытыгар ыҥырабыт. Куоластыах иннинэ кыттааччы медиавизиткатын көрөр ирдэнэр.
Сонун төрдө: СӨ Үөрэх уонна билим министиэристибэтин пресс-сулууспата
