Бэҕэһээ биллэр уопсастыбанньык Сулустаана Мыраан көмө көрдөөн интэриниэт ситимнэринэн суһал иһитиннэриилэри таһаарда. Балаҕан ыйын 11 күнүгэр оҕото Тиит Дьулус Талбан Уола киэһэ 20:00 чааска дьиэтиттэн тахсан барбыт уонна аныаха диэри кэлбэтэх. Уол чөл олоҕу тутуһар, хаһан да маннык сүппэт киһи эбит.
ИДьМ көрдүүр үлэтин түмүгүнэн, уол балаҕан ыйын 11 күнүгэр киэһэ 21:15 чааска Аллараа Бэстээхтэн Дьокуускайга кэлэр паромҥа киирбит. Камера көрдөрбүтүнэн, кини айаннаан иһэн ыскаамыйаҕа олорон хайа эрэ эр киһини кытта уһуннук кэпсэтэр. 22:50 чааска паром анаммыт сиригэр кэлэр. Ол эрээри Дьулус паромтан тахсара көстүбэт. Түүн 00:46 чааска уол ийэтигэр бассаабынан бүтэһик суругун суруйар. Ол кэнниттэн төлөпүөнэ наар арахса сылдьар.
ИДьМ үлэһиттэрэ уол төлөпүөнэ туох буолбутун быһаарбыттар: балаҕан ыйын 13 күнүгэр 14:22 ч. иитиитэ бүтэн арахсыбыт, иһигэр уу киирбэтэх (экраныгар хайдыылаах эбит), тымныыга сылдьыбатах. Онон, Дьулус паромтан тахсыбыт курдук.
Биһиги Cулустаанаҕа эрийэн уолуҥ туохтан сүтүөн сөбүй диэн ыйыттыбыт. Онуоха, «Хоруйа суох бастакы тапталлаах этэ. Ол таптала суох буолбутугар икки нэдиэлэни быһа санаарҕаабыта» диэн кэпсээтэ. Мантан сиэттэрэн, баҕар наһаа санаарҕаан,онно баттатан сылдьара буолуо диэн сабаҕалааһын үөскүүр.
Сахабыт сирин олохтоохторун сүппүт уолу балаҕан ыйын 11 күнүн 20.00 чаас кэнниттэн көрбүт эбэтэр тугу эмэ билэр буоллаххытына, ыйыллыбыт төлөпүөннэргэ эрийэргитигэр көрдөһөбүт:
+79141152345
+79991730456
+79148280764
+79969146789
Сэҥээриилэр