Саха сирин урбаанньыттарын форума балаҕан ыйын 19 күнүттэн 23 күнүгэр диэри буолуоҕа.
Тэрээһиҥҥэ өрөспүүбүлүкэ араас муннугуттан тус сыаллаах-соруктаах, актыыбынай урбаанньыттар мустуохтара. Кинилэр бэйэлэрин ситиһиилээх биисинэс-бырайыактарын кытта билиһиннэриэхтэрэ уонна саҥа саҕалааччыларга сүбэ-ама быһыытынан бэйэлэрин уопуттарыттан үллэстиэхтэрэ.
Манна тус дьыалалаахтар (самозанятые), урбаанньыттар уонна тус биисинэстэрин арыйар соруктаах дьон билсиилэрин хаҥатыахтарын, дискуссиялаах тэрээһиннэргэ сылдьыахтарын, быраактыкалаах воркшоптарга уонна маастар-кылаастарга кыттыахтарын, бастыҥ биисинэс-кейстэри кытта билсиэхтэрин сөп.
Форум спикердэрэ - СӨ Урбааҥҥа, атыыга уонна туризмҥа миниистирэ Тимур Ханды, СӨ Экономикаҕа миниистирэ Майя Данилова, Саха сиригэр урбаанньыттар бырааптарын көмүскүүр боломуоччуйалаах Альбина Кычкина, Клио Хотелс генеральнай дириэктэрэ Геворг Аветисян (Краснодар), «Сделано в Якутии» СӨ Урбаанньыттарын Ассоциациятын бэрэссэдээтэлэ уонна «Көмүлүөк» хампаанньа дириэктэрэ Ольга Григорьева, биисинэс-тириэньэр Елена Майзлина (Санкт-Петербург), фудфотограф Наталья Оконешникова уо д.а.
Форум пленарнай сессиятыгар СӨ Ил Дархана Айсен Николаев кыттыыны ылыаҕа.
Эгэлгэ тиэмэҕэ дискуссионнай былаһааккалар үлэлиэхтэрэ; дьиэ кэргэн урбааныгар сыһыаннаах, тус үлэлээх (самозанятые) дьоҥҥо судаарыстыбаннай өйөбүл туһунан, атыы-эргиэн, ИТ-хампаанньалары судаарыстыба өйөөһүнүн, туризм уонна тыа хаһаайыстыбатын тэрилтэтин сайыннарыы туһунан төгүрүк остуоллар ыытыллыахтара. Маны сэргэ, сибээстэри олохтооһун биржата, «Сделано в Якутии» быыстапка, быраактыкалаах воркшоптар, үөрэтэр уонна дьарыктыыр (тренинговые) тэрээһиннэр буолуохтара.
