Сэрии, сут-кураан энчирэппит Чурапчы оройуонун 41 колхуоһун дьоно 1942 сыллаахха аны хоту улуустарга күүс өттүнэн көһөрүллүбүттэрэ. Барыта 5318 киһи, 1837 дьиэ кэргэн Кэбээйи, Эдьигээн, Булуҥ оройуоннарыгар барбытыттан быстар аҥаардара эрэ дойдуларыгар эргиллибитэ. Бу алдьархай биһиги улууспут сайдыытын отучча сыл атахтаабыта, дьоммут-сэргэбит ахсаанын лаппа аҕыйаппыта.
Ыраах айаҥҥа аара суолга киһи бөҕө өлөн, борохуокка оҕо-уруу, кырдьаҕас суорума суолланан, өлөн-сүтэн, хотугу улуустарга сыккырыыр тыыннара эрэ тиийбитэ. Бэрт аҕыйах киһи дойдутугар төннүбүтэ.
Маннык ыарахаттары ааспыт оройуон дьоно харытын ньыппарынан, охсуулаах үлэтинэн, мындыр өйүнэн, сатабылынан, дьүккүөрүнэн-дьулуурунан, олох бары эйгэтигэр ситиһиилэнэн, өрөспүүбүлүкэ биир бастыҥ көрдөрүүлэрдээх улууһунан буолбута.
Төһө да ардах түспүтүн, сэниэтэ суох ибиирдээбитин, тымныы тыаллаах күн буолбутун үрдүнэн бүгүн биһиги дьоммут сырдык ааттарын кэриэстиир, чүмэчи уотун уурар күммүт.
Хоту көһөрүллүү 80 сылынан балаҕан ыйын 10 күнүттэн саҕалаан араас дьаһаллар ыытылла тураллар. Бу күнү кэриэстээн бэҕэһээ Эдьигээнтэн, Кэбээйиттэн дэлэгээссийэ кэллэ. Бүгүн сарсыарда 10 чаастан көһөрүллүү мемориалыгар миитин буолара күүтүллэр. Ол кэнниттэн 10ч 40 мүн Хатылы нэһилиэгэр айаннаан “Көһөрүллүү мусуойун” көрүү буолар. 14 чаастан “Айылгы” оройуоннааҕы НАДь-гэр Мунхалов галереятыгар биллэр фотограф Григорий Турантаев хаартыскатын итиэннэ көһөрүүгэ аналлаах кинигэ быыстапката тэриллиэҕэ. Эбиэттэн киэһэ 16ч 30 мүн Петр Решетников аатынан норуодунай тыйаатыр Мария Герасимова-Сэҥээрэ суруйуутунан испэктээк көрдөрүөхтэрэ. Онтон киэһэ 20 чаастан Чурапчы нэһилиэгин көһөрүллүү мемориалыгар “Өйдөбүнньүк марша” диэн медиа-таетрализованнай дьүһүйүү уонна өйдөбүнньүк чүмэчи уурааһына буолуоҕа.
Чурапчы улууһун официальнай саайтыттан ылылынна
