Өрөспүүбүлүкэҕэ Педагогтар декадалара ыытыллар турар. Бу кэрдиис кэм сүрүн тэрээһининэн Учууталлар уонна педагогическай уопсастыбаннас XIV-с «Открытое образование – пространство возможностей» сийиэстэрэ буолуоҕа. Сийиэс алтынньы 4-с күнүттэн 7-с күнүгэр диэри ыытыллыа.
Сийиэс дэлэгээттэрэ Дьокуускайга кэлитэлээн эрэллэр. Кинилэр киэҥ далааһыннаах бырагырааматтан бэйэлэригэр туһалааҕын талан сылдьыахтара. Сарсын, алтынньы 4 күнүгэр, СССР норуодунай учуутала Михаила Андреевич Алексеев мэҥэ тааһыгар сибэкки дьөрбөтүн ууруу буолуо. «Арассыыйа – мин устуоруйам» түмэлгэ сарсыарда 10 чаастан «Образование, открытое в будущее» мультимедийнай быыстапка аһыллыа. Эмиэ бу күн Н.Г. Чернышевскай аатынан Бүлүү педагогическай коллеһын 100 сылыгар аналлаах «От традиций к инновациям» Өрөспүүбүлүкэтээҕи билим-быраактыка кэмпириэнсийэтэ ыытыллыа. Манна кыттааччылар Үөрэх систиэмэтин 2030 сылга диэри сайдар тосхолун, олоххо киирэр суолун-ииһин тула кэпсэтиэхтэрэ. Сийиэс биир бэлиэ тэрээһининэн СӨ Ил Дарханын иитинэн тэриллибит Төрөппүт сэбиэтин аан бастакы мунньаҕа буолуоҕа.
Учууталлар уонна педагогическай уопсастыбаннас XIV-с сийиэстэрэ САССР төрүттэммитэ 100 сылыгар, САССР Үөрэхтээһинин норуодунай комиссариата тэриллибитэ 100 сылыгар уонна СССР норуодунай учуутала Михаила Андреевич Алексеев төрөөбүтэ 105 сылыгар ананар. Санатан эттэххэ, бу иннинээҕи XIII-с Сийиэс 2015 сыллаахха ыытыллыбыта.
Сонун төрдө: CӨ Бырабыыталыстыбатын уонна Ил Дарханын пресс-сулууспата