Быстах хомуур саҕаланыаҕыттан, Хабаровскай уонна Приморскай кыраай байыаннай чаастарыгар баар Саха сириттэн хомуурга тиийбит уолаттарга 400 буойуҥҥа аналлаах кэмпилиэги тиксэрдилэр. Бу туһунан Уһук Илин федеральнай уокуруктааҕы өрөспүүбүлүкэ бастайааннай бэрэстэбиитэлистибэтигэр иһитиннэрдилэр.
Поспредствоҕа чопчулаан эппитэринэн, кэмпилиэккэ тус аптечка, пенка-ковриктар, утуйар мөһөөччүктэр, сидиэнньэлэр уонна даҕаны атын аармыйаҕа туһалыан сөптөөх мал-сал киирдилэр. Маны сэргэ, Дьокуускайтан уонна өрөспүүбүлүкэ үгүс оройуоннарыттан, тэрилтэлэриттэн гуманитарнай көмө таһаҕастара тиийэ тураллар эбит.
«Маны таһынан, постпредство Саха сириттэн хомуурга тиийбит дьон дааннайдарын тэҥниир. Алтынньы 3 күнүнээҕи туругунан, сыыһа хомуур олохтоммутун түмүгэр, өрөспүүбүлүкэҕэ 300-кэ киһи төттөрү кэллэ», - диэн биэдимистибэҕэ иһитиннэрдилэр.
Эрдэ, Айсен Николаев өрөспүүбүлүкэ олохтоох бэйэни салайар уорганнарыгар сыыһа ыҥырыы тахсыбатын туһугар байыаннай хамыыһыйаларын кытта ыкса алтыһыыны үөдүтэргэ сорудахтаабыта. Кини хомуурга сыыһа түбэспит дьон төттөрү дойдуларыгар тиийиэхтээхтэр диэн быһаарбыта.
