«Якутоптторг» тэрилтэ Арктика оройуоннарыгар анаан Хотугу муора суолунан аан бастакытын таһаҕас тиэйэн аҕалла. 730 туонна аһы-үөлү уонна үс атыы-логистика киинин тутар матырыйаалы тиэммит СТК-1012 теплоход Астрахань куораттан Черскэй бөһүөлэгэр диэри икки ый устата айаннаата.
“Дойду бэрэсидьиэнин сорудаҕынан билигин хоту сиргэ таһаҕаһы тиэйии туһунан федеральнай сокуон оҥоһуллар. Федеральнай бүддьүөт көмөтө логистика кыһалҕалаах боппуруостарын быһаарарга улахан суолталаах. Оттон биһиги өрөспүүбүлүкэ уһук сирдэригэр фруктаны уонна оҕуруот аһын тиэрдэр бастыҥ уопуппут, ол иһигэр «Якутоптторг» бырайыага, атын субъектарга холобур буолар кыахтаах”, - диэн Ил Дархан Айсен Николаев урут этэн турардаах.
Бородууктаны Краснодар кыраайын, Астрахань уобалаһын оҥорон таһаарааччыларыттан атыыласпыттар. Ол иһигэр бурдук, саахар, курууппа, мокоруон, мас арыыта, кэнсиэрбэ, суок, дьаабылака, эриэппэ луук, хортуоска баар. Бу Булун, Усуйаана, Аллараа, Орто, Үөһээ Халыма улуустарын хааччыйыыга туһуланар. «Якутоптторг» тэрилтэ генеральнай дириэктэрэ Николай Алексеев этэринэн, табаары оҥорон таһаарааччылартан быһа атыылаһан Хотугу байҕалынан тиэйэн аҕалыы сыана чэпчииригэр дьайыылаах буолбут.
Халыма улуустарыгар эбии аһы-үөлү бу күннэргэ «Магдебург» (416,7 туонна) «Росслау» (101,5 тонн) тымнытардаах теплоходтар Черскэйгэ тиэйэн аҕалыахтара.
Сонун төрдө: CӨ Бырабыыталыстыбатын уонна Ил Дарханын пресс-сулууспата
Хаартыска: Алексей Курило («Колымская правда»)
