МТС мобильнай интэриниэт Дьокуускайга балтараа төгүл түргэтээтэ

МТС тэрилтэтэ мобильнай интэриниэт Дьокуускайга балтараа төгүл үрдүүрүн туһунан иһитиннэрдэ.

Саҥа түргэннээх уонна хаачыстыбалаах LTE сибээһин тупсубут өҥөтүнэн Дьокуускай олохтоохторо бары туһаныахтарын сөп буолла. Билиҥҥи туругунан, МТС интэриниэтэ түргэтээбитин Строительнай, Автодорожнай, Киин, Бырамыысаланнай уонна Гагаринскай уокурук олохтоохторо биллилэр. Маны таһынан, түргэн мобильнай интэриниэт олохтоохтор таптаан сынньанар сирдэригэр, култуурунай тэрээһиннэр ыытыллар миэстэлэригэр, чуолаан Орджоникидзе уонна Ленин болуоссаттарыгар, Эргэ Куоракка, Өлүөнэ кытылыгар, «Өрөгөй» спортивнай бэлэмнэнии кииниттэн чугас эҥээр уонна даҕаны атын сирдэргэ баар буолбут.

«Улахан куораттарга түргэн интэриниэккэ наадыйыы куруутун улаатар – бу киһиэхэ хас даҕаны гаджеттаах буолуутун кытта сибээстээх. Биһиги көрөрбүтүнэн, Дьокуускай олохтоохторо актыыбынайдык онлай-сервистэри туттар, мессенджердэргэ ыарахан ыйааһыннаах контеннарынан үллэстэр, чугас дьоннорун кытта видеовызовынан кэпсэтэр, социальнай ситимнэр быһа биэриилэригэр элбэхтэ тахсар буолбуттар. Биһиги абоненнарбытыгар кыараҕас буолбатын уонна мобильнай интэриниэт көмөтүнэн тутаах боппуруостары дьиэттэн, үлэттэн уонна сынньалаҥтан даҕаны эрэллээхтик быһааралларын туһугар, тохтобула суох базовай ыстаансыйалар трафиктарын ырытабыт, үлэлэрин сааһылыыбыт. Маны сэргэ, Сахабыт сирин улахан куораттарыгар – Нерюнгрига, Мирнэйгэ, Ленскэйгэ уо.д.а. мобильнай интэриниэт түргэтээн биэрдэ», - диэн Саха Өрөспүүбүлүкэтин МТС дириэктэрэ Прокопий Неустроев иһитиннэрдэ.