Алтынньы 5 күнүгэр Дьокуускай аһаҕас бибилэтиэкэтин уонна Саха уобаластааҕы түмэлин икки этээстээх таас дьиэтэ (билиҥҥитэ СӨ Национальнай бибилэтиэкэтин Устуоруйа саалата) аһыллыбыта 111 сылын туолла. Бу дьиэ архитектура пааматынньыга уонна XX үйэ саҥатыгар ирбэт тоҥҥо сэдэх инженернэй тутуу холобура буолар. Маны сэргэ, бу дьиэ хотугу кыраай култуурунай уонна духуобунай олоҕун сайдыытыгар сүҥкэн суолталаах.
Бэлиэ күн үүнүөн эрэ иннинэ бибилэтиэкэ үлэһиттэрэ сэдэх докумуону – Арассыыйа императора Николай II бу дьиэ аһыллыытынан эҕэрдэлээбит телеграмматын буллулар. Кини Саха сирин губернатора И.И. Крафт аатыгар маннык суруйбут: «Поручаю Вамь передать Преосвященному Мелетию и всемь бывшимь на освящении здания Областного музея и Городской Библиотеки Мою благодарность за выраженныя Мне Верноподданнические чувства».
Император телеграмманы Крым Ливадиятыттан 1911 сыл алтынньы 7 күнүгэр бибилэтиэкэ уонна түмэл үөрүүлээх аһыллыытын ыалдьыттарын алтынньы 5 күнүнээҕи эҕэрдэлэригэр хоруйдаан ыыппыт. Сэдэх докумуон копиятын Устуоруйа саалатыгар кэлэн көрүөххүтүн сөп.
