РФ Силиэстийэлиир кэмитиэтин салайааччыта Александр Бастрыкинныын көрсүһүү кэмигэр, Арассыыйа бэрэсидьиэнэ Владимир Путин Кырыымнааҕы муостаны эстэриини Украинатааҕы анал сулууспалар толорооччулара уонна сакаастааччылара оҥорбуттар диэн этэр. Бу туһунан РИА сонуннара иһитиннэрэр.
«Манна саарбаҕалааһын суох. Бу – Арассыыйа гражданскай сүрүн инфраструктуратын алдьатар соруктаах теракт», - диэн В.В. Путин бэлиэтээн этэр.
Силиэстийэлиир Кэмитиэт холуобунай дьыала тэрийбит. Силиэдэбэтэллэр быһаарбыттарынан, эстибит грузовик хаһаайына Краснодарскайтан төрүттээх эбит. Барыллаан чинчийии быһаарбытынан, эстии түмүгэр, грузовик таһынан айаннаан испит кыра массыынаҕа олорсон испит үс киһи өлбүт.
Силиэстийэлиир Кэмитиэт бэрэссэдээтэлэ быһаарбытынан, эстэриини олоххо киллэриигэ Украина анал сулууспаларын кытта Арассыыйа уонна тас дойдулар олохтоохторо кыттыгастаахтар эбит.
Бастрыкин эппитинэн, билигин силиэдэбэтэллэр тахсыбыт буруйу оҥоруу соруктарын быһаарыыга үлэлииллэр. СК бэрэссэдээтэлэ бары көстүбүт чахчылар түмүктэриттэн көрдөххө, бу гражданскай инфраструктура эбийиэгин суох оҥорууга туһуламмыт террористическай дьайыынан буолар диэн бэлиэтээн этэр.
Санатар буоллахха, алтынньы 8 күнүгэр Кырыымнааҕы муостаҕа дэлби тэптэрии буолбута – айаннаан испит фура эстибитэ, онуоха гөрүүчэйдээх сэттэ цистернэ умайан тахсыбыта. Түмүгэр, муоста икки күргэ систэрин арытын сорох чааһа сууллубута. Онуоха, хата, устар аал ханаалын үрдүнээҕи тирэхтэр тыытыллыбакка хаалбыттара.
Билиҥҥи турунан, Кырыым муостатыгар кыра массыыналарга эрэ анаан, айан суолун реверсивнэй эрэсииминэн чөлүгэр түһэрбиттэр. Маны таһынан, тимир суол айана эмиэ чөлүгэр түспүт – билигин поездтар бэйэлэрин расписаниеларынан айанныыллар. Ол эрээри, фуралар уонна оптуобустар паромунан эрэ айаны тутуохтаахтар. Кырыым баһылыга Сергей Аксенов бэлиэтээн эппитинэн, бу барыта быстах кэмҥэ ылыллыбыт миэрэнэн буолар.
