Анал байыаннай эпэрээссийэ буола турар сиригэр баар «Барс-2» баҕа өттүнэн тэриллибит байыаннайдар этэрээттэригэр Саха сириттэн пикап массыынаны уонна өссө биир баһыылка баартыйатын өрөспүүбүлүкэ Уопсастыбаннай балаататын бэрэссэдээтэлэ Николай Бугаев тиксэрдэ.
«Биһиги бүтүн дойду уонна биир дойдулаахтарбыт өйөбүллэрин биллибит. Бары Аҕа дойду туһугар биир сомоҕо буоллубут. Эһиги өйөбүлгүт биһиэхэ диэри тиийдэ. Биллэн турар, бу көмөҕүт биһиэхэ байабыай дьайыылары оҥорорбутугар абырыаҕа. Эһиэхэ улахан махтал!» - диэн «Боотур» сахалар этэрээттэрин хамандыыра, «Барс» иккис этэрээтин хамандыырын солбуйааччы Александр Колесов уонна байыаннайдар Саха сирин Ил Дарханыгар уонна олохтоохторугар махтал тылларын эттилэр.
«Биһиги бэйэбит байыаннай сулууспалааччыларбытыгар кинилэр чугас дьоно уонна аймахтара хомуйбут баһыылкаларын туттартаатыбыт. Байыастарыбытыгар өрөспүүбүлүкэ бырабыыталыстыбатыттан уонна тэрилтэлэриттэн көмө кэллэ. Маны таһынан, этэрээт туттарыгар анаан пикап массыынаны тиксэрдибит. Саха сирэ өссө даҕаны салгыы биһиги уолаттарбытыгар көмөлөһө туруоҕа», - диэн эрэгийиэн Уопсастыбаннай балаататын бэрэссэдээтэлэ Николай Бугаев бэлиэтээн эттэ.
Өрөспүүбүлүкэҕэ байыаннайдарга аналлаах көмө хомуллар. Ыстаапка оройуоннартан уонна тэрилтэлэртэн баһыылкалар кэлэ тураллар. Бырабыыталыстыба усчуотун суотугар эбии экипировка атыылаһылынна. Байыаннай хомуурга түбэспиттэргэ күн ахсын көмөнү сарсыарда 10.00 чаастан киэһэ 18.00 чааска диэри Дьокуускай куорат Орджоникидзе уулуссатын 10-с нүөмэрдээх дьиэтигэр оҥоруоххутун сөп (киирии Тыа хаһаайыстыбатын Министирэистибэтин өттүттэн) диэн СӨ Ил Дарханын уонна бырабыыталыстыбатын пресс-сулууспатыгар иһитиннэрдилэр.
