Бүгүн Госдума дьиэ кэргэн, дьахтар уонна оҕо кыһалҕаларын быһаарар кэмитиэтин бэрэссэдээтэлэ Нина Останина бэйэтин телеграм-ханаалыгар хомууртан босхолонор араҥа испииһэгэр 16 диэри саастаах үс оҕону иитэр дьону босхолуур туһунан көннөрүү киирбитин иһитиннэрдэ. Дьокутаат бу көннөрүү киириитигэр тус өҥөлөөҕүн бэлиэтиир.
Көннөрүү олоххо киирбитин РФ Сэбилэниилээх күүстэрин Генштабын салайааччыта В.Герасимов байыаннай уокуруктарга алтынньы 4 күнүгэр ыыппыт 315/2/3658дсп нүөмэрдээх суруга бигэргэтэр. Онон, инники түөрт оҕолоох уонна төрдүс оҕотун кэтэһэ сылдьар аҕалары эрэ босхолуур буоллахтарына, аны 16 диэри саастаах үс оҕолоохтору эмиэ босхолуохтара.
Дьиҥэр, Госдума балаҕан ыйыгар киллэрбит сокуонун бырайыагар 18 диэри саастаах үс оҕолоох уонна 23 сааһыгар диэри күнүскү үөрэххэ үөрэнэр устудьуон оҕолоох аҕалар босхолууру туруорсубуттара. Ону баара, Оборона кэмитиэтэ бу туруорсууга тугу да хардара илик. Ол эбэтэр, сокуон бырайыагын ылынар санаата суох курдук.
Санатан этэр буоллахха, Госдуума судаарыстыбаны тутууга уонна сокуону оҥорууга кэмитиэтин бэрэссэдээтэлин солбуйааччы Сардаана Авксентьева РФ Оборонаҕа министиэристибэтигэр үс оҕолоохтору хомууртан босхолуур туһунан сурук ыыппыта.
Сонун төрдө: https://www.fontanka.ru/
