Креативнай индустрия оскуолаларын тэрийиигэ федеральнай бюджеттан субсидия ылар иһин РФ субъектарын ортотугар ыытыллыбыт куонкурус кыайыылаахтара билиннилэр. Манна Саха сириттэн үс сайаапканы СӨ култуураҕа уонна духуобунай сайдыыга министиэристибэтэ бэлэмнээн ыыппыта. Ол түмүгэр, икки сайаапка кыайан, Саха сирэ 85,7 мөл. солкуобайы ылар буолла.
Миниистир Юрий Куприянов иһитиннэрбитинэн, креативнай индустрия оскуолалара П.П. Романов аатынан Дьокуускайдааҕы ойуулуур-дьүһүннүүр училищеҕа уонна А.Д. Макарова аатынан Дьокуускайдааҕы култуура уонна ускуустуба коллеһыгар тэриллиэхтэрэ.
- Маннык оскуолалары тэрийии оҕолор айар дьоҕурдарын сайыннарар саҥа ньыма буолар. Ойуулуур-дьүһүннүүр училищеҕа 90-тан тахса оҕо анимацияҕа, 3D-графикаҕа, хаартыскаҕа түһэриигэ, видеоны уһулууга, дизайыҥҥа үөрэниэхтэрэ. Оттон Култуура коллеһыгар звукорежиссураҕа уонна тыас дизайыныгар, хаартыскаҕа түһэриигэ уонна видеоны уһулууга, электроннай муусукаҕа үөрэтэр үс устуудьуйаны тэрийиэхпит. Онон, бу үөрэх кыһаларыгар Саха сирин киинэтин, муусукатын, тыйаатырын кэскиллэрэ уһуйуллан тахсыахтара, - диэн миниистир бэлиэтээтэ.
РФ Култууратын министиэристибэтин креативнай индустрия оскуолаларын туһунан бырайыага регионнарга 12-тэн 17-гэр диэри саастаах оҕолор айар дьоҕурдарын сайыннарыыга эйгэлэри тэрийиигэ туһуланар. Ол быһыытынан, манна оҕолору сыл ахсын ылан иккилии сыл үөрэтиэхтэрэ.
Сонун төрдө: https://minkult.sakha.gov.ru/
