Дьүкээгир омугу сөргүтэр «Ярхадана» аһымал пуондатын көҕүлээһининэн, ойуур уонна туундара дьүкээгирдэрин тылын үөрэтэр икки интерактивнай кэпсэтинньиги бэлэмнээтилэр. Ол туһунан хотугу төрүт олохтоохтор «Илкэн» порталлара иһитиннэрэр.
Бастакы бырайыак нууччалыы-дьүкээгирдии «Анньэл Одул» ойуур дьүкээгирдэрин кэпсэтинньигэр Нелемное сэлиэнньэттэн Сахая Миронова уонна Вячеслав Солнцев толорбут үс түһүмэхтээх ойуу киинэлэрэ киирдилэр. Оҕолор Тося уол уонна Ярхадана кыыс көмөлөрүнэн дьүкээгир тылын сүрүн лиэксикэтин уонна грамматикатын үөрэтиэхтэрэ. Тылы илдьэ сылдьааччы Любовь Демина бырайыак мэтэдьииһэ буолбут уонна тиэкистэри суруйбут.
Иккис бырайыакка - туундара дьүкээгирдэрин тылын баайын үйэтитиигэ туһуланар «Wadul» электроннай мобильнай кэпсэтинньиккэ - күннээҕи олоххо туттуллар тыллар уонна этиилэр киирдилэр. Электроннай кэпсэтинньиги «Ярхадана» аан ситимигэр таһааран, туундара дьүкээгирдэригэр тарҕатыахтара. «Биһиги тылбытын уонна култуурабытын үйэтитэр хамсааһыҥҥа эдэрдэри тардыахтаахпыт. Ол аныгы технологиялары киэҥник туһанан эрэ ситиһиллэр», - диэн дьүкээгир ытык дьонун сүбэтин салайааччыта Вячеслав Шадрин тоһоҕолоон эттэ.
Бырайыактары олоххо киллэриигэ «Саха сирэ» технопарк резиденэ, ООО «МультиДиТек» үлэлэстэ. Дириэктэр Таисия Тарабукина «Анньэл Одул» ойуу киинэлээх кэпсэтинньиги оҥоруох иннинэ худуоһунньуктар дьүкээгир култууратын, төрүт таҥаһын, ойуутун-бичигин кичэйэн үөрэппиттэрин бэлиэтээтэ. Бырайыактары СӨ Арктика сайдыытыгар уонна Хотугу норуоттарын дьыалаларыгар министиэристибэтэ, СӨ тас сибээскэ уонна норуоттар дьыалаларыгар министиэристибэтэ өйөөтүлэр.
Сонун төрдө: http://yarhadana.ru.
