Уһук Илиҥҥэ эрэ буолбакка бүтүн Сибиир үрдүнэн суох, үрдүк технология туһаныллар, аныгы тэриллэринэн хаачыллар Искэни эмтиир киин үлэҕэ киирэрин күүтээччи үгүс.
Бу кииҥҥэ үлэлиэхтээх быраастары Арассыыйа, тас дойду клиникаларыгар ыытан, анаан үөрэттэрэ ыытыы эрдэттэн саҕаламмыт. Холобур, былырыын 189 исписэлиис стажировкаламмыт, оттон быйыл 9 ыйыгар сэминээрдэргэ, билим быраактыка кэмпириэнсийэлэригэр 99 киһи дьарыктаммыт.Москубатааҕы А.С.Логинов аатынан клиникалаах билим киинин кытта ыкса сибээс олохтоммут. Аан дойдуга киэҥник биллэр онколог-хирург Игорь Евгеньевич Хатьков биһиги исписэлиистэрбитигэр хаста да искэни эпэрээссийэлээн көрдөрбүт, үөрэппит. Кини ахсынньы ыйга Дьокуускайга кэлэн, видеоэндоскопическай эпэрээссийэни оҥорууга маастар-кылааһы ыытыахтаах.
Күн бүгүн искэн диспансерыгар 500-тэн тахса эмчит үлэлиир. Оттон саҥа кииҥҥэ 1103 үлэһити былаанныыллар. Ол аата, 600-чэҕэ чугаһыыр быраас, медсиэстэрэ, инженер, санитарка курдук идэлээхтэргэ наадыйаллар.
Быйыл диспансерга 12 эдэр быраас, мэдиссиинэ орто анал үөрэхтээх 14 үлэһитэ эбиллибит. Килииникэлээх ординатураҕа билигин 26 быраас үөрэнэ сылдьар. Оттон Искэн киинигэр үлэлиир каадыр бэлэмин бырагырааматынан, дойду үрдүк үөрэҕин кыһаларыгар 31 киһи үөрэнэр, оттон орто медперсоналга – 27 киһи.
Быйыл үрдүк үөрэх кыһаларыгар тус сыаллаах миэстэҕэ – 13, килииникэлээх ординатураҕа – 14, Дьокуускайдааҕы мэдиссиинэ коллеһыгар -- 20 устудьуон киирбит.
