Киир

Киир

Саха сирин салалтата федеральнай биэдэмистибэлэргэ аэропортар үлэлиир кэмнэрин уһатарга этии киллэрдэ. Бу, халлаан туругуттан риэйсэ тохтотуллар түгэнигэр, көтүүнү атын күҥҥэ көһөрбөккө ыйыллыбыт күҥҥэ көтүтэр кыаҕы биэриэх этэ.

 «Аэропорт үлэтин регламена улахан суолталаах. Хомойуох иһин, билигин федеральнай тэрилтэлэр үбүлээһиннэрэ тиийбэтиттэн аэропортар хонуктаах режиминэн үлэлээбэттэр. Ол иһин халлаан туругуттан тохтотуллубут риэйсэлэри атын күҥҥэ көһөрөргө күһэллэбит», – диэн Саха сирин тырааныспарга миниистирэ Владимир Сивцев .    

Маны сэргэ, Саха сирэ  Росавиация иннигэр өрөспүүбүлүкэ  11 аэропордун саҥардан тутуу боппуруоһун туруорда. Бу Ленскэй, Сунтаар, Алдан, Усуйаана, Анаабыр, Уус Майда, Дьааҥы, Өлөөн, Үөһээ Халыма улуустар уонна Маҕан аэропортара. Бу этиилэри өрөспүүбүлүкэ алтынньы 26 күнүгэр Дьокуускайга буолбут «Транспортная доступность Дальнего Востока – это эффективное взаимодействие дальневосточной авиакомпании и аэропортов» стратегическэй сессияҕа киллэрбитэ.

«2024 сылга диэри магистральнай инфраструктураны саҥардан тутуу уонна кэҥэтии комплекснай былаанын чэрчитинэн өрөспүүбүлүкэҕэ15 аэропорду саҥардан тута сылдьаллар. Итилэри таһынан, биһиги бу былааҥҥа киирбэтэх 11 аэропорду саҥардан тутары туруорсабыт. Оччоҕо өрөспүүбүлүкэ хай баҕарар муннугар тырааныспар тиийиитэ баар буолуо», – диэн Ил Дархан Айсен Николаев тоһоҕолоон эттэ. Кини бэлиэтээбитинэн, Саха сирин аэропортара 40-50-с сылларга тутуллубуттар, ол иһин дьыл уларыйар кэмигэр былаһааккалара алдьанан үлэлэрэ харгыстанар.

Сонун төрдө: CӨ Бырабыыталыстыбатын уонна Ил Дарханын пресс-сулууспата

Тарҕат:

Санааҕын суруй

Бүтэһик сонуннар