Киир

Киир

Быйыл аармыйа сулууспатыгар күһүҥҥү ыҥырыы, биир ыйынан хойутаан, сэтинньи 1 күнүттэн саҕаланар. Дойду бэрэсидьиэнин Владимир Путин 691 №-дээх Ыйааҕынан, аармыйаҕа  120 тыһыынча киһини ыҥырар сорук турар. Манна  18 сааһыттан 27-гэр диэри саастаах эдэр дьон хапсаллар.

Билигин дьону, бастатан туран, ыҥырыллааччылары анал байыаннай дьайыыларга ытыахтара диэн санаа долгутар. Кинилэри сулууспа кэмигэр ыыппатахтарын иһин, болдьохторо бүтээтин кытары ыытыахтарын сөп сабаҕалааһын баар. Онуоха, РФ Судаарыстыбаннай Дууматын Оборонаҕа кэмитиэтин бэрэссэдээтэлэ Андрей Картаполов «Парламент хаһыатыгар» ол туһунан ыйытыыга аармыйа сулууспатыгар ыҥырыллааччылары анал байыаннай дьайыыларга уонна Арассыыйа састаабыгар киирбит саҥа уобаластарга ыыппаппыт диэн эппитэ.

“Срочниктары” Донецкай, Луганскай норуодунай өрөспүүбүлүкэлэргэ, Херсоҥҥа уонна Запорожьеҕа ыытыахтара суоҕа. Бу сулууспалыы сылдьааччыларга уонна саҥа барааччыларга барыларыгар сыһыаннаах. Сокуон ирдииринэн, сулууспалаан бүппүттэри дьиэлэригэр, оттон саҥа ыҥырыллыбыттары байыаннай чаастарга ыытыахтара”, — диэн парламентарий мэктиэлээбитэ.

Аармыйа сулууспатыгар күһүҥҥү ыҥырыы «Байыаннай эбээһинэс уонна байыаннай сулууспа туһунан» федеральнай сокуон ирдэбилинэн тэриллэр. Сокуон 31-с ыстатыйата этэринэн, бэбиэскэни байаҥкамаат үлэһиттэрэ ыҥырыллааччыга бэйэтигэр илии баттатан эбэтэр үөрэнэр уонна үлэлиир тэрилтэтин нөҥүө туттарыахтаахтар. Ыҥырыллааччы көстүбэт түгэнигэр байаҥкамаат көрдөөһүҥҥэ полицияны кытыннарыан сөп. Бэбиэскэни тутан баран, туох да төрүөтэ суох эрээри, байаҥкамаакка кэлбэтэх киһиэхэ холуобунай дьыала тэриллиэн сөп. Холуобунай кодекс  328-с ыстатыйатынан,  аармыйа сулууспатыттан куотунууга 200 тыһ. солкуобайга диэри ыстараап, икки сылга диэри болдьохтоох көннөрөр үлэҕэ ыытыы, алта ыйга диэри көҥүлү хааччахтааһын эбэтэр икки сылга диэри хаайыы көрүллэр.

Аармыйа сулууспатыттан кылгас кэмҥэ эбэтэр букатын босхолонуу туһунан ыйыллыбыт сокуоҥҥа ааҕыахха сөп. Сокуонунан бэриллибит быраапкытын үчүгэйдик үөрэтиҥ уонна туһаныҥ диэн сүбэлиибит.  

Сонун төрдө: Парламентская газета

Хаартыска: https://m.tvzvezda.ru

Тарҕат:

Санааҕын суруй