М.С. Щепкин аатынан Тыйаатыр үрдүкү училищетын Саха устуудьуйатын устудьуоннара Бүтүн Арассыыйатааҕы #МЫВМЕСТЕ аахсыйаҕа кыттыстылар. Кинилэр «Боотур» этэрээт байыастарыгар анаан госпитальга туттуллар набордары бэлэмнээтилэр уонна бэрэски астаатылар.
4 куурус устудьуона Айталина Яковлева кэпсииринэн, устудьуоннар волонтер буоларга бэйэлэрэ быһаарыммыттар. Москубаҕа СӨ Бастайааннай бэрэстэбиитэлистибэтин иһинэн тэриллибит волонтер штабыттан Саха сириттэн астыырга ананан кэлбит олохтоох бородууксуйаны ылбыттар.
«Бары бииргэ санаабытын ууран, үтүөнү баҕаран туран астаатыбыт. Онтон төрдүө буолан, Иван Кузьмин, Ефрем Татаринов, Петр Домотов уонна мин, волонтер штабыгар илдьэн биэрдибит. Онно биир дойдулаахтарбытын - «Боотур» этэрээт байыастарын көрсүбүппүт. Кинилэр биһиги астаабыт бурдук аспытын госпитальга сытар доҕотторугар тиэрдиэхтэрэ», - диэн Айталина Яковлева кэпсээтэ.
Биир кэлим координационнай киин Ил Дархан Айсен Николаев быһаарыытынан СӨ Бастайааннай бэрэстэбиитэлистибэтин иһинэн алтынньы 14 күнүгэр тэриллибитэ. Киин байыаннай сулууспалаахтарга уонна кинилэр дьиэ кэргэттэригэр көмөлөһүү, дойду састаабыгар саҥа киирбит сирдэри чөлгө түһэрии, олохтоохторго көмөлөһүү боппуоруостарын сүрүннүүр.
Сонун төрдө: СӨ Бырабыыталыстыбатын уонна Ил Дарханын пресс-сулууспата
