АХШ уонна Арҕаа Европа дойдуларын эргимтэлэрин кигиитинэн Украина салалтата Арассыыйаны кытта сыһыаннарыгар буола турар уустук дьайыылар дойдубут бары норуоттарын биир сомоҕоҕо түмтүлэр. Аҕа дойду көмүскэлигэр эрэллээхтик туруннубут, дойдуга саҥа холбоспут түөрт субъегы көмүскээн быстах хомуур ыытыллан, элбэх биир дойдулаахпыт фронҥа тиийэн сэриилэһэ сылдьаллар.
Маныаха Саха сирин олохтоохторо Арассыыйа үрдүнэн ыытыллар “Бары бииргэбит” хардарыта көмөлөсүһүү акциятыгар көхтөөхтүк кытталлар. Ол курдук, соторутааҕыта Горнай улууһун Мытаах нэһилиэгин таас баараҕай тутуулаах сынньалаҥ дьиэтигэр “Ис сүрэхтэн көмө” акция тэрээһиннээхтик ыытылынна.
Биир дойдулаахпыт, норуот суруйааччыта Софрон Петрович Данилов “Огдооччуйа эмээхсин” сэһэнигэр олоҕуран, Илья Егорович Варламов аатынан сынньалаҥ киинин уус-уран салайааччыта, туруорааччы-режиссер Изабелла Максимова нэһилиэк үөрэнээччилэрин, эдэр ыччатын, аҕам саастаахтарын кыттыылаах туруоруутугар Аҕа дойду улуу сэриитин кыһалҕалаах сылларыгар саха ыалын соҕотох күнҥэ көрбүт уолларын Ийэ дойду көҥүлүн иһин фронҥа сэриигэ ыыталларын, оччотооҕу ыарахан кэмҥэ көстөр араас түгэннэри, ол иһигэр сэриилэһэ сылдьан өлбүттэр хара суруктара кэлэрин туһунан араас хабааннаах көрдөрүүлэри быйылгы быстах хомуурга ыҥырыллыбыт дьонноох көрөөччүлэр уйадыйа көрдүбүт, дойдубут салалтата уонна норуот бииргэ түмсэн кыайыы өрөгөйүн билиэхпит диэн бигэ санааҕа кэллибит.
Туруорууну таһынан, тэрээһинҥэ ас араас көрүҥүн атыылыыр дьаарбаҥка ыытылынна. Акцияттан киирбит үп Донецкай, Луганскай народнай өрөспүүбүлүкэлэр олохтоохторугар көмө быһыытынан барыаҕа.
Ити курдук литератураҕа, искусствоҕа, наукаҕа, салалтаҕа бөдөҥ талааннаах дьону үүннэрэн таһаарбыт уонна 1700 сыллартан баай историялаах Мытаах нэһилиэгин олохтоохторо дойдубутугар уустук кэм сатыылаабытыгар ис сүрэхтэн көмөлөһөбүт, туора турбаппыт.
