Дьокуускайга «Килбиэннээх үлэ куората» бочуоттаах аат иҥэрилиннэ

Алтынньы 15 күнүгэр Арассыыйа бэрэсидьиэнэ Владимир Путин өрөспүүбүлүкэбит киин куоратыгар Дьокуускайга «Килбиэннээх үлэ куората» бочуоттаах ааты иҥэрдэ. Бу ааты Улуу Аҕа дойду сэриитигэр Кыайыыга сүҥкэн кылааты киллэрбит куораттарга иҥэрэллэр.

“Биһиги киин куораппыт Дьокуускай бу ааты ылбыта олус сөптөөх. Онон, Сахабыт сиригэр аны икки “Килбиэннээх үлэ куората” баар – Алдан уонна Дьокуускай!” - диэн Ил Дархан Айсен Николаев бэйэтин Telegram-ханаалыгар суруйбут. Кини Дьокуускайга бу ааты иҥэрии туһунан хадаатайыстыбаны дойду аҕа баһылыгар 2020 сыллаахха ыыппыт эбит.

Кииг куоракка бу ааты иҥэриини көмүскүүр мунньахха Арассыыйа наукаларын академиятын бэрэсидьиэнэ Геннадий Красников биһиги тэрилтэлэрбит Судаарыстыбаннай оборона кэмитиэтин Кыһыл Знамя уордьанынан наҕараадаламмыттарын бэлиэтээбит. «Дьокуускай сэрии кэмигэр, 40 туонна көмүһү уонна дойдуга уотунан барар тэриллэргэ туттуллар слюда-флогопит улахан аҥаарын хостоон,  бүттүүн оборона бырамыысалыннаһын хааччыйбыта», – РНА бэрэсидьиэнэ тоһоҕолоон эппит.

РНА эспиэрдии түмүгүнэн, Дьокуускай куорат улуу кыайыыга сүҥкэн кылааты киллэрбитин, куорат олохтоохторо уонна кэллэктииптэрэ эҥкилэ суох үлэлээбиттэрин уонна наҕараадаламмыттарын туһунан чахчылар барыта докумуонунан бигэргэммиттэр. Ол курдук, Оборона министиэристибэтин архыыбыгар Улуу Аҕа дойду сэриитин кэмигэр Дьокуускай «АлСиб» 1-кы авиационнай дивизията Кыһыл Знамя уордьанынан наҕараадаламмытын туоһулуур докумуоннар көстүбүттэр. Ол кэмҥэ тыын суолталаах “Алсиб – Аляска – Сибирь” салгын трассата Дьокуускайынан ааһара. Маны сэргэ, киин куоракка Красноярскайдааҕы ВВС РККА салгын трассатын штаба, Бүтүн Сойуустааҕы судаарыстыбаннай көмүһү хостуур «Якутзолото» трест управлениета,  Саха сирин өрүһүнэн устар аалларын управлениета уонна онтон да атын тэрилтэлэр таһаарыылаахтык үлэлээбиттэр. Дьокуускайтан Аҕа дойду сэриитигэр 60 тыһыынча кэриҥэ киһи барбыт. Дьокуускай олохтоохторо фроҥҥа сүҥкэн көмөнү ыыппыттар.

Дьокуускай иҥэриллибит «Килбиэннээх үлэ куората» бочуоттаах аат Астрахань, Вологда, Горловка, Златоуст, Каспийскай, Луганскай, Норильскай уонна Орскай куораттарга иҥэриллибит.

Сонун төрдө: СӨ Бырабыыталыстыбатын уонна Ил Дарханын пресс-сулууспата