Киир

Киир

Маабыра күөл Аппааны сэлиэнньэтин ортотугар турар. Аттыгар элбэх социальнай, култуура, атыы-эргиэн уонна дьаһалта эбийиэктэрэ бааллар. Бу күөлгэ уруккуттан сэлиэнньэ маассабай тэрээһиннэрин ыыталлар эбит. Күһүн ахсын хатыыскалыыр сир, хоккей кордун оҥороллор, оттон кыһын саҥа дьыллааҕы харыйаны туруораллар, саас оҥочонон хатааһылыыллар үһү. Быһата, нэһилиэк олоҕо бу күөл тула эргийэрэ.

Сопхуос ыһыллыбытын кэннэ күөл уута олус киртийэн бадарааҥҥа кубулуйан, уолар кутталламмыт. Нэһилиэк дьаһалтата 2015 сылтан күөлү чөлүгэр түһэрэр үлэни ыыта сатаабыт даҕаны, үп-харчы тиийбэккэ, тохтоон хаалбыт. Хата, бу сылга күөл кытылын тупсаран оҥоруу бырайыага "Табыгастаах куорат эйгэтин тэрийии" уонна "Уһук Илиҥҥэ 1000 тиэргэни" икки бырагыраамаҕа киирэн, нэһилиэк ыра санаата олоххо киирдэ.

DJI 0225.MP4 snapshot 03.06 2022.11.13 21.22.57 2

Ол курдук, күөл муостатын саҥардан биэрбиттэр, кытылы кыйа тротуар дорожкаларын тэлгэппиттэр, уотунан сырдаппыттар уонна күрүөлээбиттэр. Тупсарыллыбыт кытылга "Аппааны" арт-эбийиэги, аныгылыы оҕо оонньуур былаһааккатын, улууска бастакы роллердрому уонна воркаут-зонаны туппуттар. Эбийиэк бэдирээччитэ - Владислав Соловьев. Бырайыак ааптара - архитектор Прокопий Рожин.

DSC07614 2

"Уруккуттан сөбүлүүр кытылбыт тупсарыллан саҥа көрүҥнэммитэ биһиэхэ улахан үөрүү. Бу күнү бары уһуннук кэтэстибит. Онон, “LETO” сатабыл киинигэр уонна Архитектура управлениетыгар бырайыак олоххо киирбитин иһин махтанабыт, - диэн Аппааны сэлиэнньэтин баһылыга Иван Ноговицын үөрүүтүн үллэһиннэ.

DSC07261 2

Кытыл үрдүнээҕи сынньанар сир төгүрүк сыл үлэлиэҕэ. Кыһын хаҥкылыахтара, саҥа дьыллааҕы харыйа туруоруохтара, сайын байдарканан хатааһылыахтара. Күөлтэн чугас эмиэ тупсарыллыбыт Кыайыы искибиэрэ уонна саҥа тутуллубут Култуура дыбарыаһа тураллар.

Санатан эттэххэ, быйыл Саха сиригэр "Уһук Илиҥҥэ 1000 тиэргэни" бырагыраамаҕа 124 тиэргэн уонна аччыгый пааркалар киирбиттэр. Сэтинньи 1 күнүттэн 30 күнүгэр диэри 2023 сыллааҕы бырагыраамаҕа киириигэ сүүмэрдиир күрэс ыытыллар.

Сонун төрдө: “LETO” сатабыл киинэ

Хаартыска: Никита Федоров

Тарҕат:

Санааҕын суруй