Сэтинньи 22-24 күннэригэр II-с Өрөспүүбүлүкэтээҕи саха тылын, литэрэтиирэтин уонна төрүт култууратын учууталларын сийиэһэ буолуо. Билигин Саха сиригэр 600-тэн тахса саха тылын уонна литэрэтиирэтин учуутала үлэлии сылдьаллар.
Тэрээһин Саха АССР төрүттэммитэ 100 сылыгар, сахалартан бастакы тыл үөрэхтээҕэ, учуонай, саха суругун-бичигин төрүттээччи С.А. Новгородов төрөөбүтэ 130 сылыгар уонна «Саха Өрөспүүбүлүкэтин тылларын туһунан» сокуон ылыныллыбыта 30 сылыгар ананар.
Сийиэскэ «СӨ судаарыстыбаннай уонна официальнай тылларын 2020-2024 сылларга харыстааһын уонна сайыннарыы» бырагырааманы билиһиннэриэхтэрэ. Бу докумуоҥҥа сүрүн болҕомто саха тылын, литэрэтиирэтин уонна төрүт култууратын аныгы ньыманан үөрэтиигэ ууруллуо. Маны таһынан, Саха тылын уонна литэрэтиирэтин үөрэтии кэнсиэпсийэтин дьүүллэһиэхтэрэ. Санатан эттэххэ, I-кы Сийиэс 2017 сыллаахха ыытыллыбыта.
Сонун төрдө: CӨ Бырабыыталыстыбатын уонна Ил Дарханын пресс-сулууспата
