Алтынньы 25 күнүттэн өрөспүүбүлүкэҕэ РФ экэниэмикэтин сайдыытын миниистирэ Максим Решетников уонна РФ сыыппаара сайдыытын уонна маассабай коммуникация миниистирэ Максут Шадаев кэлэн үлэлии сылдьаллар. Кинилэр Арассыыйаҕа сыыппара суверенитетын уонна куттала суох интэриниэт эйгэтин тула кэпсэтиһэр “Сыыппара алмааһа” форумҥа кытталлар.
Ону таһынан, миниистир Максут Шадаев Анаабыр улууһун Сааскылаах сэлиэнньэтигэр сибээс волоконно-оптическай лииньийэтин үөрүүлээх холбонуутугар тиийэ сылдьыаҕа уонна Дьокуускай “IТ-Пааркатын”, регион сыыппара эйгэтин уларытыыга штабын үлэтин билсиэҕэ.
Максим Решетников урбаан эйгэтин бэрэстэбиитэллэрин кытта көрсөн судаарыстыбаннай өйөбүл миэрэлэрин туһаныы туругун, ол иһигэр туризмы, дьүүллэһиэҕэ. Маны сэргэ, кини Саха сирин социальнай-экэнэмиичэскэй сайдыытыгар аналлаах сүбэ мунньах ыытыаҕа, төгүрүк сыл үлэлиир «Саюри» тэпилииссэ үлэтин, «Үлэ таһаарыылаах буолуута» национальнай бырайыак чэрчитинэн олоххо киирбит «Дьокуускайдааҕы килиэп кэмбинээтэ» АУо бырайыактарын билсиэҕэ.
Миниистирдэр СӨ Ил Дархана Айсен Николаевтыын көрсүөхтэрэ.
Сонун төрдө: СӨ Бырабыыталыстыбатын уонна Ил Дарханын пресс-сулууспата
Хаартыска: Андрей Сорокин
Сэҥээриилэр