2022 сылга Саха сирин тас эргиниитин кээмэйэ 28%, экспорда 31% улаатта, ордук Кытай норуодунай өрөспүүбүлүкэтин кытта үлэлэһии күүһүрдэ диэн СӨ Бырабыыталыстыбатын уонна Ил Дарханын пресс-сулууспата суруйар.
Өрөспүүбүлүкэ тэрилтэлэрэ тиэхиньикэни, туттуллар тэрили, бэлэм бородууксуйаны Кытайтан, ону сэргэ Турцияттан уонна Вьетнамтан элбэхтик атыылаһар буолбуттар.
Санатан эттэххэ, 2022 сыл кулун тутар ыйыгар Ил Дархан Айсен Николаев сорудаҕынан импорды солбуйууга үлэлиир суһал бөлөх тэриллибитэ. Бу бөлөх олохтоох тэрилтэлэргэ тас дойду оҥорон таһаарааччыларын буларга, дьыалабыай сыһыаны олохтуурга уонна атыылаһыллыбыт табаары тиэйэн аҕалыыга көмөлөһөр.
Ити кэмтэн суһал бөлөх аатыгар 40 көрдөһүү киирэн, тэрилтэлэргэ ирдэнэр тэрили, саппаас чаастары уонна матырыйааллары Арассыыйаттан уонна хааччах киллэрбэтэх дойдулартан ыларга көмөлөстүлэр. Маны сэргэ, суһал бөлөх көмөтүнэн тэрилтэлэр табаардарын электроннай атыы былаһааккаларыгар атыылыахтарын уонна СӨ экспорды өйүүр кииниттэн сүбэ-ама ылыахтарын сөп.
Сонун төрдө: CӨ Бырабыыталыстыбатын уонна Ил Дарханын пресс-сулууспата
