2022 сыл ахсынньы 17 күнүгэр Ил Дархан Айсен Сергеевич Николаев уонна “Саханефтегазсбыт” аахсыйалаах уопсастыба генеральнай дириэктэрэ, Ил Түмэн дьокутаата Виктор Николаевич Лебедев Ленскэй куоракка араас көрүҥ уматыктаах “АЗС-48” арыйдылар.
Өрөспүүбүлүкэҕэ “Саханефтегазсбыт” АУо туппут уонна көрөн-истэн үлэлэтэр элбэх уматыктаах бу иккис “АЗС” буолар.
“АЗС-48” аһыллыытын үөрүүлээх тэрээһинигэр СӨ Бырабыыталыстыбатын бэрэссэдээтэлин маҥнайгы солбуйааччы Дмитрий Дмитриевич Садовников, “Ленскэй оройуона” МТ баһылыга Жумарт Жакслыкович Абильманов, куорат мээрийэтин, бырамыысыланнас тэрилтэлэрин бэрэстэбиитэллэрэ уо.д.а. кытыннылар.
Тэрээһин кыттыылаахтарын эҕэрдэлээн туран, Ил Дархан Айсен Николаев дойду уонна өрөспүүбүлүкэ айылҕа гааһын уматыгар (газомоторнай) көһөрө наадалааҕын уонна суолталааҕын эттэ:
– Бу, бастатан туран, улахан экэниэмийэ буолар. Уматык ороскуотун 40 %-ҥа диэри кэмчилиир кыах үөскүүр. Итиэннэ айылҕа гааһа уматыкка көстөхпүтүнэ, өрөспүүбүлүкэ олохтоохторугар уонна айылҕабытыгар экологическай уларыйыылар буолуохтара. “Саханефтегазсбыт” судаарыстыба бэлиитикэтин өйүүрүттэн уонна хаамыытыгар тэҥҥэ барсан иһэриттэн үөрэбин. Өрөспүүбүлүкэ бырабыыталыстыбатыгар элбэх функциялаах сапыраапкалыыр саҥа ыстаансыйалары тутууга эрэллээх хардыылары оҥорорун иһин махтанабын, – диэн баһылык бэлиэтээтэ.
Ил Дархан махтал тылларын Виктор Николаевич Лебедевкэ уонна кини салайан үлэлэтэр кэлэктиибигэр эмиэ туһаайда. Кини салгыы:
– “Саханефтегазсбыт” кылгас кэм иһигэр “АЗС-48” тутан үлэҕэ киллэрдэ. Ыстаансыйаны Арассыыйа аныгы тэриллэринэн хааччыйдылар. “АЗС” ботуччу үпкэ, 330 мөл. солкуобайга, тутулунна. Бу тутуу өрөспүүбүлүкэ атын улуустарыгар элбэх уматыктаах сапыраапкалыыр ыстаансыйалар тутуллан үлэҕэ киирэллэригэр холобур буолуоҕа, – диэтэ.
“Саханефтегазсбыт” генеральнай дириэктэрэ Виктор Николаевич Лебедев тэрилтэ ыытар үлэтэ өрөспүүбүлүкэ олохтоохторугар ананарын бэлиэтээн эттэ уонна Ил Дархан Айсен Сергеевич Николаевка Саха сиригэр айылҕа гааһын уматыгын ырыынага сайдарыгар өйөбүлүн иһин махтанна. Кини этэринэн, нэһилиэнньэ, бэйэ дьарыктаах дьон, дьоҕус, орто урбаан бэрэстэбиитэллэрэ, ордук тыа сирин олохтоохторо, тыа хаһаайыстыбатынан дьарыктанааччылар бүддьүөттэригэр бэнсиин, диисэл уматыгын ороскуота улаханнык охсорун эттэ. Ыгыллыбыт гаас уматыкка көстөхтөрүнэ, ороскуоттара биллэ кыччыырын санатта.
Массыынаны сапыраапкалыыр элбэх уматыктаах саҥа ыстаансыйаҕа Ленскэй оройуон олохтоохторо, бырамыысыланнас тэрилтэлэрэ, муниципальнай тырааныспар араас көрүҥ уматыгы – 92, 95 бэнсиини, диисэлгэ туттуллары уонна саамай барыстааҕынан, экологичнайынан биллэр айылҕа ыгыллыбыт гааһын (КПГ) – уматык гынар кыахтаннылар. Маны таһынан суоппардар “АЗС-48” ыстаансыйаҕа электромобилы ииттэриэхтэрин сөп. Ол туһугар 80 киловатт кыамталаах уотунан иитиллэр ыстаансыйаны туруордулар. Манна электромобиль 15 мүнүүтэ иһигэр сэрээттэнэр кыахтаах.
“Саханефтегазсбыт” АУо дириэктэрэ Виктор Лебедев кэпсээбитинэн, “АЗС-48” салайар киинэ атыттарга тэҥнээтэххэ, быдан улахан, киэҥ-куоҥ. Уопсай иэнэ – 315 кв.м. Итинтэн атыы-эргиэн саала 97 кв.м ылар. Атыы-эргиэн киинигэр араас саастаах дьоҥҥо аналлаах табаар эгэлгэтэ баар: массыына тэрилэ, бородуукта, утах. Холобур, минньигэс хот-догу тото-хана сиэххэ, дьиҥнээх кофены иһиэххэ сөп. Килийиэннэргэ аналлаах табыгастаах санузелы оҥорбуттар. Доруобуйаларынан хааччахтаах дьоҥҥо аналлаах эмиэ баар.
2027 сылга диэри айылҕа гааһа уматыктаах ыстаансыйалары сайыннарарга хампаанньа былааныгар сөп түбэһиннэрэн, бу кэннэ Дьокуускай куорат Бүлүүлүүр суолугар турар “АЗС-3” ыстаансыйаны саҥардан оҥоруохтара. Салгыы Хаҥалас Покровскайыгар саҥа “АЗС” тутуута былааҥҥа турар. Ол кэннэ Дьокуускайга “АЗС-1”, Мэҥэ Хаҥалас Майатыгар баар ыстаансыйаны саҥардыахтара. “Элбэх уматыктаах “АЗС” ыстаансыйалара гаас ситимэ тардыллыбыт сирдэригэр тутуллаллар”, – диэн Виктор Николаевич быһаарда.
Генеральнай дириэктэр эппитинэн, өрөспүүбүлүкэ уонна федеральнай бүддьүөт өйөбүлүнэн хампаанньа уопсайа 56 мөлүйүөн суумалаах (федеральнайтан – 36 мөл. солк., өрөспүүбүлүкэттэн – 20 мөл. солк.) субсидияны ылар былааннаах.
Санатан эттэххэ, “Саханефтегазсбыт” АУо өрөспүүбүлүкэҕэ билиҥҥитэ элбэх уматыктаах “АЗС” тутан үлэлэтэр соҕотох хампаанньа буолар.
Сэҥээриилэр
Cheers cast. Robert mitchum. B12 vitamin.