Бэҕэһээ СӨ Бырабыыталыстыбатын бэрэссэдээтэлин солбуйааччы Ольга Балабкина анал байыаннай дьайыылар кыттыылаахтарын дьиэ кэргэттэрэ санаторийга-курорка эмтэниигэ көмөнү уонна оҕоҕо 3 сааһыгар диэри босхо үүт аһылыгы хайдах ылары быһаарда.
Кини санаторийга-курорка эмтэниигэ көмөнү Саха сиригэр олорор байыаннайдар төрөппүттэрэ үс сылга биирдэ туһаныахтарын сөп диэтэ. «Бу көмө путевканы атыылаһан ылыы ороскуотун сабарга ананар, ол эрээри 60 тыһ. солкуобайтан тахсыа суохтаах. Төрөппүттэр төлөбүр 80 %-нын эрдэ эбэтэр сынньанан кэлбит кэннэ ылыахтарын сөп», – диэн салгыы чопчулаата.
Сайабылыанньаны, ирдэнэр докумуоннары сыһыаран, судаарыстыбыннай уонна муниципальнай өҥө порталын нөҥүө ыытыахха эбэтэр МФЦ – га тиийэн туттарыахха сөп.
Оттон 3 сааһыгар диэри оҕолоох төрөппүт үүт аһылыгы оҕо поликлиникатыгар тиийэн ылар. Бу көмөҕө сайабылыанньаны эмиэ үөһэ ыйыллыбыт икки ньыманан биэриэххэ сөп.
Сонун төрдө: CӨ Бырабыыталыстыбатын уонна Ил Дарханын пресс-сулууспата
