Күндү биир дойдулаахтарым!
Саха Өрөспүүбүлүкэтин Ил Түмэнин аатыттан кэлэн иһэр 2023 сылынан уонна Ороһуоспанан итиитик-истиҥник эҕэрдэлиибин!
Саҥа дьыл алыптаах бырааһынньыгын күүппэт киһи, арааһа, суоҕа буолуо. Оҕо саас аптаах кэмигэр курдук, харыйабытын симиибит, баҕа санаабытын этэбит, туох эрэ дьиктини-кэрэни, сырдыгы-ырааһы эрэнэ күүтэбит. Саҥа дьыл бырааһынньыга үс үйэ устатыгар биһиги дойдубутугар биир саамай күүтүүлээх бырааһынньык буолар. Ити кэм тухары үтүө да, мөкү да, киэҥ далааһыннаах да, бытархай да, үөрүүлээх да, хомолтолоох да үгүс түгэн буолан ааста.
Саҥа 2023 сылы көрсө, үгэс курдук, түмүк таһаарабыт, саҥа сыал-сорук туруорабыт, дойдубут саргылаах сарсыҥҥытын туһугар, дьиэ кэргэммит уонна оҕолорбут туһугар салгыы айабыт-тутабыт.
Үүнэр сылга баҕарбыт баҕа санааҕыт барыта туолуохтун, Саҥа дьыл үтүөнү, сырдыгы эрэ түстээтин. Үүнэр сыл – Үлэ сыла – кынаттаах кыайыыларга, саҥа саҕахтарга сирдээтин!
Чугас дьоҥҥутугар, дьиэ кэргэҥҥитигэр баҕарабын кытаанах доруобуйаны, үтүө туругу, самныбат саргыны уонна бары үтүөнү-кэрэни! Саҥа дьыл уонна Ороһуоспа бырааһынньыктарыгар эһиги дьиэҕит үөрүүнэн-көтүүнэн, сылаас сыһыанынан, уостубат тапталынан туоллун!
Сэҥээриилэр