2023 сыл саҕаланыыта 122 нүөмэрдээх «аһаҕас лиинийэҕэ» 389 киһи эрийбит. Ол туһунан салайааччы Мария Винокурова кэпсээтэ.
«Дьон үксэ анал байыаннай дьайыыларга сылдьар аймахтарын сүтэрэн, онтон долгуйан, ханна хайдах сылдьарын билээри эрийэллэр. Ону сэргэ, бааһырбыт байыастарга уонна сулууспалаахтар дьиэ кэргэттэригэр көмөнү оҥоруу туһунан ыйыталлар», – диэн кини иһитиннэрдэ.
«Аһаҕас лиинийэ» салайааччыта байыаннай чааска сылдьан смартфону туттар, хаартыскаҕа түһэр уонна видеоҕа уһулар көҥүллэммэтин бэлиэтээтэ. Байыастар хамандыыр көҥүлүнэн кунуопкалаах эбэтэр стационарнай төлөпүөнтэн анаммыт кэмҥэ эрэ эрийэн кэпсэтиэхтэрин сөп.
Мария Винокурова быһаарбытынан, байыас ханна хайдах сылдьарын туһунан информацияны Оборона министиэристибэтин үлэһитэ чугас аймахтарыгар эрэ биэрэр бырааптаах. Холобурдуур буоллахха, тохсунньу 5 күнүгэр биир байыас ийэтэ уонна бииргэ төрөөбүтэ эрийэн бааһырбыт уолларын сураспыттар. Онуоха, лиинийэ үлэһиттэрэ Оборона министиэристибэтин үлэһитин кытта холбообуттар. Ол түмүгэр, байыас полевой госпитальга сытара, сотору кэминэн байыаннай госпитальга көһөрө биллибит. Дьоно кинини, сахалыы аата сыыһа суруллубутуттан сылтаан, кыайан булбакка сылдьыбыттар.
Байыастар кыһалҕаларын быһаарыыга атын министиэристибэлэр уонна биэдэмистибэлэр эмиэ кыттыһаллар. Ол курдук, Доруобуйа харыстабылын министиэристибэтин көмөтүнэн, мэдисиинискэй докумуоннарын сүтэрэн кыайан эмтэммэккэ сылдьыбыт байыас, докумуоннарын сөргүтэн, Дьокуускай балыыһатыгар эмтэнэн киирэр буолбут.
Байыастар кыһалҕаларынан чугас дьонноро Дьокуускайга 122 кнопка 1, оттон атын сиртэн 8(4112)510-122 нүөмэринэн эрийиэхтэрин сөп.
Сонун төрдө: CӨ Бырабыыталыстыбатын уонна Ил Дарханын пресс-сулууспата
